Recientemente, Prome Minister Evelyn Wever-Croes a biaha pa Hulanda pa atende varios reunion, di cual un importante ta e reunion cu Buitenlandse Zaken. Mirando cu Aruba tin un director nobo na Directie Buitenlandse Betrekking (DBB), cu ta Sra. Jocelyne Croes, ta importante pa yega na cierto acuerdo entre e dos instancia aki.

Den un comunicado di prensa, Prome Minister a indica cu e reunionnan cu Buitenlandse Zaken “a bay hopi bon, na unda a yega na acuerdo con pa fortifica DBB pa asina Aruba tambe por yuda y duna di su parti den Reino.”

Prome Minister a expresa di por a nota cu Buitenlandse Zaken na Hulanda tin un respet grandi pa Aruba, “y pa e maneho cu e Gobierno aki ta hibando. Nan ta desea di sigui traha cu pais Aruba, y kier pa nos yuda nan cu otro paisnan den region.”

Segun Wever-Croes a indica den un comunicado di prensa, un otro bon noticia ta cu nan lo bay yuda Aruba cu e atraso cu tin den cierto tratadonan cu ta hopi urgente. Un di e tratadonan ta esun di Istanbul, cu ta un tratado na unda paisnan a palabra, y bay di acuerdo, pa bin cu mas medida pa asina frena y evita abuso di hende muhe. Violencia domestico, specialmente contra e ser femenino. Esaki ta un tratado cu Aruba kier rectifica y implementa lo mas pronto posibel, y awor tin e compromiso cu nan lo bay yuda cu esaki. E otro tratado cu nan lo bay yuda cune, ta e “kinderontvoeringsverdrag” cu ta e tratado riba secuestro di muchanan. Sigur un tratado sumamente importante pa pais Aruba.

Otro topico cu tabata riba agenda na momento cu a toca temanan di region, ta Venezuela. Premier Wever-Croes a indica cu por nota cu despues cu tabata tin e acuerdo di Barbados, Merca a cuminsa lanta algun sancion pa 6 luna, si Venezuela tene su mes na palabracionnan, cual lamentablemente no ta e caso. Pa loke ta pais Aruba, “nos mester ta cauteloso, pa asina evita di bay depende un biaha mas riba un pais cu cualkier momento por dal frontera cera. Gobierno di Aruba ta trahando riba e trayecto pa habri frontera back, na un forma serio, responsabel y cu ta safe pa tur hende” segun e comunicado.

“Finalmente mi mester bisa di ta sumamente satisfecho cu e cooperacion cu Aruba tin cu Buitenlandse Zaken. Pami e tabata un honor di a wordo invita pa habri nan conferencia “Shaping the Feminist Foreign Policy”, cu ta e maneho di relacion exterior cu paisnan cu no ta respeta derecho di hende muhe, cu un discurso. Aki tambe Aruba y Buitenlandse Zaken a yega na bon palabracionnan con pa sigi traha hunto pa atende cu temanan di Relacion Exterior. Un conferencia hopi positivo” Prome Minister a expresa.