Aruba, mescos cu Corsou, St. Maarten, pero tambe Boneiro, St. Eustatius y Saba por haci peticion riba subsidio di e Fondo Europeo di Desaroyo. Asina Stef Blok, Minister di Economia y Clima, hunto cu Secretario di Estado Dilan Yeşilgöz-Zegerius di Asuntonan Economico, Clima y Energia a contesta Tweede Kamer.
E Minister a ricibi e pregunta for di cua fondo nacional y internacional, paisnan CAS y islanan BES lo por aplica pa asina por logra inversion den durabilidad y transicion di energia.
Segun Blok y Yeşilgöz-Zegerius, e paisnan autonomo den Reino, esta Corsou, St. Maarten y Aruba tin nan mesun maneho y financiamento. E islanan BES ta pertenece na e pais autonomo Hulanda.
E financiamento di logra sostenibilidad y e transicion di energia den e islanan BES ta rekeri trabou na medida, pa motibo cu e situacion fiscal ta diferencia hopi. Por ehempel riba e islanan no ta paga accijns riba combustibel cu ta procedente di fuente di petroleo y no tin belasting of cualkier accijns riba electricidad. Consecuentemente, e proyeccion comercial pa inversion den sostenibilidad ta otro pa motibo cu e tarifa di referencia ta diferencia y e produccion tecnico di un turbina di biento of di panel solar ta mas halto na e islanan. Tampoco por haci comparacion, pasobra e islanan no conoce un mercado di coriente unda tin companianan cu ta competi cu otro. Tin un productor monopolistico cu ta regula y riba dje, e islanan ta biba cu e realidad cu nan escala ta hopi chikito. Consecuentemente e provision di electricidad ta califica como un structura micro riba su mes.
Mester bisa cu aunke cu Corsou, St. Maarten y Aruba ta mas grandi cu e tres islanan BES, hecho ta cu e condicionnan ta mescos. Aki tambe tin un productor monopolistico cu ta regula pa Gobierno.
Pa loke ta e islanan BES, Hulanda no por aplica e reglanan generico cu ta conta pa e parti Europeo. Consecuentemente Saba y St. Eustatius por ehempel a ricibi un subsidio specifico di forma cu a hisa e contribucion di electricidad for di fuentenan alternativo for di 0 pa 43 porciento.
