ORANJESTAD – Den cuadro di JVO (Justitieel Vierlanden Overleg) cu a tuma luga siman pasa na Aruba mes, a logra un palabracion caminda Aruba ta bay lidera e proyecto pa bin cu un propuesta di ley riba proteccion di data personal.
Esaki lo tuma luga conhuntamente cu experticio di Hulanda, Corsou y St. Maarten, pa por bin cu e HBG cu por complementa cu esun di Union Europeo. E mandatario di Husticia ta considera locual pais Aruba a logra den JVO como un logro ‘sumamente importante’.
E ley di proteccion di data personal (HBG) cu a bin na vigor na Union Europeo (UE) y Hulanda tambe ta resorta den dje. E ley aki tin su consecuencia tambe pa pais Aruba, segun e mandatario.
Minister Andin Bikker a indica cu dia 25 di mei ultimo, gobierno di Aruba a manda un carta pa Hulanda, pa pidi nan asistencia tecnico pa nos por haci tambe e parti di legislacion tocante data personal pa proteha esaki. E intencion ta pa bin cu e ley aki cu ta cuadra cu esun di UE.
