E prome anuncio riba uzo di vacuna na Aruba a wordo haci pa Prome Minister, Evelyn Werver-Croes kende a informa cu nos pais lo participa den esaki pronto.

Tur cos ta indica cu ya caba pa fin di aña aki un grupo di persona, specialmente esunnan mas vulnerabel y tambe e trahadonan di sector di cuido, lo haya e prioridad di haya e vacuna di forma boluntario y gratis. Tur esaki pa medio di palabracion haci den Reino Hulandes.

E vacuna aki no ta uno obligatorio y tampoco e no ta un vacuna via experimental. E prome mandatario a bisa cu nan ta bay purba di elimina tur preocupacionnan di e hendenan cu por ta preocupa pa e efectonan negativo di e vacuna aki.

Sin menciona e vacuna, minister di Salubridad Publico, Dangui Oduber a bisa cu tin tres vacuna cu ya caba a pasa dor di e fase hopi extenso y nan a demostra cu ta mas cu 90% efectivo. Gobierno Hulandes a compromete caba cu Aruba cu na momento cu e vacunanan aki bira disponibel, nan lo comparti e vacuna aki cu nos pais.

Ainda nan mester discuti den seno di gobiernonan di Reino e reparticion do e vacunanan riba e islanan cu ta forma parti di dje. Sinembargo inicialmente e lo por ta un lote di 3 mil vacuna considerando e personal cu ta traha den e sector di cuido, persona di edad grandi y tambe esunnan di grupo di riesgo.

DVG

Sharline Koolman di DVG a bisa cu ya caba nan a cuminsa prepara nos mes pa ricibi e vacunanan pa fin di december comienso di januari 2021. El a bisa cu e vacuna aki no ta obligatorio ya cu na Aruba niun vacuna ta obligatorio tampoco, pero su aplicacion si ta wordo conseha.

Igualmente el a declara na Bon Dia Aruba cu e vacuna aki no ta uno experimenta, y tampoco nos hendenan no ta wordo uza como conenchi di laboratorio. Sra. Koolman a bisa cu DVG no lo conseha algo asina y tampoco niun hende, incluso gobierno, no lo bay di acuerdo cu esey. Igualmente Hulanda no lo bay na extremo ey tampoco.

Pa un decision asina DVG ta hayando guia di profesionalnan RIVM di Hulanda por ehempel, ya cu nan mester ta vacunanan confiabel cu a pasa nan procesonan. “Nos mester ta responsabel pa kico nos ta haci y pakico nos ta haci’e, manera nos ta haci’e te cu awor,” el a expresa.

Koolman a agrega cu DVG tin diferente tipo di vacuna cu ta aplica den comunidad y esun di Covid cu ta biniendo no ta e prome y e delaster tampoco. Manera e vacuna di griep cu nan ta hay’e tur aña y nan ta reparti di un manera responsabel, y esaki ta bay ta e caso cu esun di Covid tambe. Si nan ta sinti cu algo no ta bon cu e vacuna, seguramente nan no ta bay di acuerdo cu su aplicacion na Aruba.

DVG ta trahando riba un sistema digital pa por haci e peticion pa haci un cita pa evita aglomeracion na momento di duna e vacuna. Na momento cu nan por tin mas informacion riba e tipo di vacuna cu Aruba lo ricibi for di Hulanda, DVG lo informa esaki debidamente.

Aworaki debi cu DVG no sa ainda ki tipo Aruba lo bay haya, nos mester tene cuenta cu tur vacuna tin su efecto secundario, segun Sra. Koolman. Pero tur cos ta depende di e tipo di vacuna, ya cu tin diferente vacuna cu a wordo getest internacionalmente caba. Tambe mester tene cuenta riba e vacuna su aplicacion, ya sea cu ta dos aplicacion y durante cuanto tempo y tambe con el a wordo traha, ya cu tin vacuna cu ta produci algun reaccion alergico debi cu mayoria di nan ta wordo traha den webo.