Dialuna prome minister a reuni cu señora Francine Giskes di Contraloria General di Hulanda riba diferente aspecto cu nan a constata den funcionamento di CFT. Den e reunion aki prome minister a ricibi hopi informacion riba supervision financiero. E informacionnan aki ta importante pa e supervision cu nos tin awor di CAft pero mas importante pa e supervision cu gabinete Wever-Croes ta trahando riba dje di ‘Begrotingskamer’.
“E ta asina cu nos a palabra den e protocol cu Hulanda na november 2018 cu nos ta keda cu CAft 3 aña mas, y despues nos mesun Begrotingskamer mester ta cla pa tuma over. Nos Begrotingskamer ta un organo Arubano cu ta bay sigui cu e supervision financiero. Cu esaki nos ta gana nos autonomia financiero bek”, prome minister a duna di conoce.
Contraloria General aña pasa a saca un rapport den cual ta cuestiona si e supervision di CFT na Boneiro, Saba y Sint Eustatius ta efectivo y ta cumpli cu su meta. Nan a describi con e supervision lo mester mehora pa logra su meta. Aruba, preparando pa su propio Begrotingskamer, lo tuma e consehonan aki sigur den consideracion.
Señora Francine Giskes di Contraloria General di Hulanda a keda impresiona cu e empuhe y determinacion di Aruba pa logra su propio ‘Begrotingskamer’ sigui cu e supervision financiero di nos pais. “Nos meta ta: gana nos autonomia financiero bek”!
