Minister di Salubridad, Deporte y Turismo, Dangui Oduber durante un conferencia di prensa a splica cu a yega e momento pa expande e capacidad na hospital por medio di un peticion special cu gobierno a haci pa Hulanda.
Di esaki, Oduber a trece dilanti cu a nan kier expande e cantidad di cama, ventilator, tur loke ta trata ekiponan di cuidado intensivo, como tambe busca mas personal y mas medicamento.
Asina mes, el a bisa cu siman pasa, specificamente diahuebs ultimo, e tabatin un conferencia hunto cu ministernan di Corsou, Sint Maarten y tambe di Hulanda, den cual nan a yega na un palabracion cu Hulanda lo yuda pais Aruba cu 12 cama di cuidado intensivo y otro ekiponan y material cu nan a pidi, pa esaki por yuda di un miho forma posibel.
Oduber a menciona cu e strategia no ta pa traha ‘Groepsimmuniteit’, pa motibo cu ya caba nan a implementa diferente strategia pa evita cu e virus sigui plama. Loke nan kier ta pa comunidad sigui instruccionnan cu ta wordo duna.
