Aruba lo firma acuerdo di cooperacion cu Corsou, Sint Maarten y Boneiro pa salud mental y adiccion

Ayera mainta durante un conferencia di prensa Minister di Husticia y Asuntonan Social, Sr. Rocco Tjon, a elabora ariba e topico di salud mental y adiccion na Aruba, e caso lamentable di e hoben cu a fayece pa motibo di su caida di e tercer piso di Paseo Herencia y tambe a elabora tocante e convenio entre Aruba y Stichting Beheer ICT Rechsthandhaving.

Minister Tjon a anuncia durante e conferencia di prensa cu awe diabierna cu lo firma un acuerdo entre Aruba, Corsou, Sint Maarten y Boneiro pa loke ta un cooperacion specificamente ariba e tema di salud mental y adiccion. Clinica Capriles lo ta representa, como tambe Mental Health Caribbean di Boneiro, Mental Health Foundation di Sint Maarten y hunto cu GGZ Respaldo nan lo firma un convenio di cooperacion caminda hunto nan lo bay percura pa traha di cerca ariba diferente topiconan.

Un di e topiconan specifico di e convenio aki Minister Tjon a splica ta ariba e tereno di educacion, e tereno di brinda cursonan na e personal y di e forma aki lo percura, no solamente pa miho calidad pero tambe lo amplia e liña di carera di e personal cu ta traha den e area specifico aki.

E otro topico cu Minister Tjon a splica cu nan lo traha hunto ariba dje ta e parti di calidad y desaroyo, no solamente ariba e contenido di e materia pero tambe ariba e aspecto di administracion di empresanan cu Minister Tjon ta enfatisa ta hopi importante. “Ora ta trata e materia aki e gastonan ta hopi halto y mi ta kere si nos por traha hunto ariba e topiconan aki na final di dia e lo cumbini no solamente e profesionalnan cu ta traha den e profesion aki pero tambe e cuido cu nos por brinda na e clientenan”, el a bisa.

El a indica tambe cu nan ta pensando ariba proyectonan manera e-health, proyectonan caminda ta intercambia informacion cu otro pero na mes momento tambe ta salvaguardia e parti di privacidad, e parti di seguridad cibernetico cu e ta señala cu tambe ta hopi importante.

E ultimo topico cu e cuater paisnan lo colabora mas di cerca cu otro cu Minister Tjon a elabora ariba dje ta e parti di ley. El a splica cu tin diferente leynan cu mester wordo adapta, leynan cu kisas lo mester wordo introduci pa asina atende miho cu e parti di salud mental y adiccion. “Pa e motibo ey ta importante tambe cu hunto nos lo por trek op den esaki pa bundel samen e experticio pa asina por mitiga tur e retonan”, el a agrega.

El a menciona tambe cu tin un visie document cu a wordo traha pa Mental Health Caribbean, cu segun el a splica, Ministerio di Salubridad Publico anterior a cera un samenwerking overeenkomst cu Mental Health Caribbean specificamente pa asisti y duna nan conseho ariba diferente tereno. El a splica cu a base di convenio aki un di obstaculonan cu a wordo señala ta cu e cuido ta hopi parti y el a enfatisa cu ta hopi importante pa percura cu e colaboracion entre tur e departamentonan ariba e tereno aki ta mas eficiente.

“E resultado ta cu e cuido cu lo bay wordo brinda lo ta di un calidad mas halto. Mi mester bisa cu for di Ministerio cu tur e stakeholdersnan, semanalmente tin reunionnan ta tuma luga y e reunionnan aki ta bayendo hopi bon, e meta principal ta pa prome cu fin di aña logra firma un acuerdo di cooperacion entre Respaldo, FMAA y SPD. Asina no solamente e cuido ta miho pero tambe e proceso y e prome linea ta bira mas importante y bo ta baha e presion cu tin ariba e di tres y di cuatro linea”, el a indica.

Minister Tjon a informa cu diaranson el a reuni cu Mental Health Caribbean pasobra e convenio cu e Ministerio di Salubridad Publico tin cu nan ta caduca y di parti di su Ministerio nan a indica cu nan kier prolonga e convenio aki. “Mi ta kere cu e ta algo sumamente importante pa Aruba y Mental Health Caribbean tambe a indica cu nan tambe ta dispuesto pa esaki y na mesun momento nos a enfoca mesora ariba e puntonan di e vision di nos Ministerio y pa cu lo nos kier pa nan asisti nos caminda nos kier pone e enfoke”.

El a enfatisa cu pa e Ministerio di Asuntonan Social ta hopi importante pa haci e cuido di salud mental y adiccion mas accesibel na tur persona cu tin mester di dje y segun el a indica esaki lo logra a traves di un programa nobo cu lo wordo introduci cu ta un manera proactivo pa profesionalnan cu ya caba tin hopi experiencia y experticio ariba e tereno aki lo haya un curso adicional pa di un manera proactivo acerca esunnan cu ta riba caya, esunnan cu ta bringa cu un reto grandi pa loke ta adiccion y brinda nan e ayudo y cuido necesario.

“Hunto cu Mental Health Caribbean, y obviamente e stakeholdersnan local, nos lo bay hinca e proyecto aki den otro pa asina na final di dia tur ciudadano tambe por bay ripara e alivio cu esaki ta trece pa e molester cu hopi biaha esaki ta ocasiona ora nos ta riba caya”, el a agrega.

Minister Tjon a informa tambe cu otro parti importante cu nan lo enfoca ariba dje dentro di poco, palabracionnan cu tin haci caba el a bisa, ta pa yega na un centro caminda e stakeholdersnan local ta bay wordo ubica hunto pa asina por traha mas di cerca cu otro y na final di dia brinda un miho cuido

Otro aspecto cu Minister Tjon a menciona cu su Ministerio lo kier enfoca ariba dje ta e parti di educacion y cursonan. El a splica cu nan lo bay enfoca ariba e aspecto aki pa percura cu e curso- y opleidingen cu tin di haber cu salud mental y adiccion tambe forma un parti integral den e basis opleiding di tur dunadornan di cuido aki na Aruba. “Mi ta kere di e forma aki tambe bo por crea mas aceptacion, mas conscientisacion, pero na final di dia tambe lo bo por brinda un miho ayudo na esunnan cu tin mester di dje”, el a expresa.

Minister Tjon a papia tambe ariba e a caso di e hoben cu a fayece despues di un incidente hopi lamentabel na Paseo Herencia dia 17 di october. El a splica cu recherche bureau di e districto di Noord ta den pleno investigacion pa loke ta e caso aki, tin un team dedica na e investigacion y aunke e no a elabora ariba e detayenan di e investigacion, el sigura pueblo cu e investigacion ta andando y tur informacion pa loke ta e caso aki por wordo presenta a traves di tip lijn 11141.

Por ultimo Minister Tjon a elabora ariba e topico di Stichting Beheer ICT Rechsthandhaving. El a splica cu na aña 2020 Aruba a cera un convenio di cooperacion a traves di e Stichting Beheer ICT Rechsthandhaving, un fundacion cu tin e meta pa percura pa tur e departamentonan di informacion, di inteligencia y e departamentonan den e cadena hudicial pa loke ta e parti di ICT ta mas coordina cu otro pa brinda un miho producto y pa combati criminalidad di un manera mas eficiente y mas eficaz.

Segun el a indica a base di e convenio aki tin diferente proyectonan cu lo bay wordo ehecuta. El a informa cu diaranson e tabatin un reunion “sumamente positivo” cu e raad van toezicht y tambe e director di e fundacion y Aruba dentro di poco lo por apunta su miembro den e hunta di supervision. Segun el a sigui splica palabracionnan concreto a wordo haci cu den e prome kwartaal di otro aña lo bay introduci un proyecto piloto aki na Aruba pa cuerpo policial unda cu den e autonan di polis lo bay introduci e “mobile data terminals”

“Esaki ta bay facilita e trabou di e agentenan policial, e ta bay eleva nan seguridad pero hopi importante tambe e ta haci posibel cu nan por brinda un miho servicio na tur e ciudadanonan”, el a bisa.

El a indica tambe cu pa fin di november lo bay introduci e mobile app cu a wordo diseña specificamente pa e cuerpo policial di Aruba caminda tambe a traves di telefonnan inteligente polisnan cu ta riba caya por haya acceso na informacion y di e forma ey tambe por brinda un miho servicio.