Aruba lo bin cu mas control pa combati contrabanda di productonan Venezolano

Paisnan di reino lo pidi Venezuela pa responsabilisa su mes cu mas control di su frontera tambe

Ayera fraccion di MEP a referi na e decision unilateral di presidente di e pais bisiña di Venezuela, Nicolas Maduro di cera e trafico aereo y maritimo pa Aruba y tambe pa Corsou y Boneiro pa 72 ora. E anuncio aki a wordo haci diabierna anochi ultimo, y si e gobierno di Venezuela no ta dicidi otro, e decision aki a keda vigente te ayera.

Parlamentario Shailiny Tromp-Lee (MEP) a bisa cu gobierno di Aruba a anuncia cu lo bin cu mas control. Pero tambe na nivel di reino Hulandes nan lo atende e incidente aki cu a surgi cu Venezuela pa habri e dialogo pa trata e punto aki y pa ‘cada pais responsabilisa nan mes pa loke ta trata nan deber’. E asunto aki lo wordo canalisa denter di poco, ya cu mester haci algo pa preveni otro 72 ora of un periodo mas largo. Igualmente el a declara cu na nivel parlamentario nan no ta bay trata e asunto aki.

E miembro di e fraccion di MEP a responsabilisa e gobierno anterior di e situacion aki. E ta haya remarcabel cu e motibo cu gobierno di Venezuela a yega na e decision aki tin di haber cu e denuncia di contrabanda cu a wordo haci den varios ocasion y for di 2016, y cu e gobierno anterior no a haci nada pa combati nan. “E ta un motibo mas pa bisa cu e gobierno saliente a faya nos ariba e tereno aki tambe.”

Segun e parlamentario Tromp-Lee, e enfoke di e medida di e gobierno Venezolano ta poni contra Aruba, ya cu segun nan pensamento y sentimento, nada a wordo haci cu e informacion aki di parti di nos pais. Tambe den e reunion cu a wordo teni na nivel di reino entre Hulanda, Aruba y Corsou a wordo bisa cu e decision di presidente Maduro ta debi na e falta di actuacion di Aruba.

Impacto
El a señala cu e decision aki tin su impacto pa nos isla mirando e relacion estrecho cu nos tin cu Venezuela. Un punto cu fraccion di MEP ta pidi gobierno pa atende cu ne tin di haber cu e gobierno di Venezuela no solamente ta denuncia contrabanda di koper, hende, droga, etc.. pero tambe di contrabanda di productonan manera Harina Pan, Toddy, shampoo, lechi, etc.. Sinembargo e ta haya cu riba e tipo di productonan aki no ta existi un prohibicion pa wordo importa na Aruba, pues e no ta algo ilegal. Otro cos cu por tin su impacto ta riba accesibilidad na berdura y fruta fresco, y aunke nan ta producto cu nos por importa for di otro paisnan, via Venezuela e ta resulta mas barata, y e ta topico cu mester enfoca riba dje.

E ta contento cu gobierno di gabinete Wever-Croes ta enfatisa cu ta bin cu un miho control di nos costanan, pero specialmente riba nos waf y e botonan chikito cu ta nabega entre Venezuela y Aruba. Tambe e tipo di control aki ta poni den nan programa di gobernacion, el a bisa.

E ta urgi gobierno pa haci e relacion uno mas estrecho cu Venezuela pa medio di su representante diplomatico na Aruba, ya cu e ta un decision cu a wordo tuma unilateralmente, y nos autoridad local a wordo informa despues cu e decision a cay pa preveni esaki. E ta haya cu mester traha riba e tereno diplomatico aki pa e no sosode un biaha mas.