Aruba Lions Club a convoca un rueda di prensa unda cu a comparti un proyecto nobo cu Aruba Lions Club lo tin pa e comunidad di Aruba den cuadro di celebracion di su 75 aniversario.

Secretaria Magaly Dijkhoff-Arends, tesorera Magaly Franken y e incoming Tail Twister Igor Croes a anuncia e proyecto aki cual lo enfoca riba e salud di pueblo di Aruba y ta dirigi en especial pa esunnan cu tin dificultad pa yega na un examinacion medico a corto plaso.

Cu e nomber Aruba Lions Club Health Fair y e bunita slogan ‘Be Healthy, Be Happy’, e proyecto aki lo tuma luga diasabra dia 3 di juni 2023 na Aruba Lions Club mes for di 9or di atardi te cu 3or di atardi.

E proyecto aki ta ser organisa cu e meta di “mantene un comunidad saludabel riba e parti medic, dus nos lo ofrece na esunnan den necesidad e chens pa haci algun examinacion aki mes na Lions Club,” Dijkhoff-Arends a informa. Ademas di yuda riba varios tereno manera calamidad y ayudo humanitario, “hobennan cu ta focus tambe riba parti medico ta vision y diabetico ta parti hopi importante di cual Lions Club ta mantene su mes na dje,” Magaly a splica.

Den e caso aki, Aruba Lions Club lo hinca esaki tambe den su programa. Cuminsando cu dia 3 di juni, unda lo haci diferente chekeo na e club mes. Un di e chekeonan cu lo ehecuta lo ta chekeo di wowo cu un optometrista voluntario di Presicion Eye Care, ken lo ta na e club conhuntamente cu tur su ekiponan pa asina controla presion di wowo y haci examinacion di catarata. Lo tin oportunidad tambe pa haci chekeo di sanger y test di oido. FEPOH, cual ta e fundacion Arubano cu a enfoca riba oido, a haci su oficina disponibel pa Aruba Lions Club y e proyecto en cuestion, pa asina haci tur e testnan di oido y tambe lo ehecuta e testnan di sanger aki.

Den e banda pafo, lo tin e Smile Mobile cu ta proyecto di Aruba Lions Club. Smile Mobile ta un proyecto cu ta conoci pa varios aña caba unda cu ta haci limpiesa y reparacion di dentadura y ta tuma luga na casnan di cuido rond di e isla. Algun weekend pasa a caba di ehecuta un limpiesa y reparacion na diferente cas di cuido.

E Smile Mobile ta un trailer cu ta completamente ekipa cu dos experto kendenan lo haci e reparacion di e djentenan falso di nos hendenan y aki lo concentra mas. “Nos hendenan por yega akinan cu nan djente falso y e lo wordo haci limpi, e lo wordo revisa pa nos expertonan y si tin algo cu mester wordo drecha (cu nos por haci na e momentonan aki) nos expertonan di nos Smile Mobile” lo por haci esaki. Den caso cu e doño mes di e djente falso no por bin, nan por manda e dentadura cu otro persona y e expertonan di Smile Mobile lo duna e servicio.

Un di e puntonan cu a enfatisa ta cu tur esaki lo ta completamente gratis, Magaly a informa cu “Lions Club ta esun cu ta core cu gasto di tur esakinan. Si nos bay back unrato na Smile Mobile cu a pasa e casnan di cuido, tur e trabaonan cu nos a haci tabatin costo di casi 7,000 florin cu a wordo cubri pa Lions Club.” Tur e actividadnan di recaudacion di fondo cu Lions Club ta ehecuta durante e aña ta loke ta haci posibel pa nan por brinda e ayudo aki sumamente importante e incondicional na e pueblo di Aruba. Pa medio di tur e donacionnan cu e pueblo di Aruba ta haci, nan por cubri e gastonan di e proyectonan.

Ta importante pa menciona cu tur e servicionan aki cu lo duna gratuitamente, lo keda haci pa e voluntarionan di Aruba Lions Club y otro profesionalnan cu lo haci esaki. “Tur esakinan mane nos ta bisa ta voluntariamente. Tur hende cu ta bin yuda nos ta haci esaki voluntariamente,” Magaly a declara. Lo tin trailernan ekipa presente durante e Health Fair unda lo acomoda otro instancianan cu tambe lo yuda.

Un aspecto di e proyecto cual mester tene cuenta cune ta cu aunke e deseo pa yuda tey, tin varios factor pa tene na cuenta cu por limita e cantidad di persona cu por yuda y pa motibo aki mester tene na cuenta e orario stipula pa e proyecto aki, cual ta di 9or di mainta pa 3or di mainta. “Nos mester mantene nos mes den e orario cu nos tin cu e voluntarionan cu lo yuda nos. Nos ta pidi mas trempan hendenan bin, mas hende nos por yuda.”

Aunke berdaderamente lo brinda tur 5 tipo di servicio na e health fair aki, pues chekeo oido, wowo, sanger, pecho y dentadura, ta bon pa duna prioridad na e servicio pa cual mas necesidad tin. Di e manera aki, ta duna e oportunidad cu tur hende por haya e servicio cu nan tin mester, “bin haci esun cu ta mas necesario pabo na e momentonan ey pa asina bo por duna chens na otronan cu por haci otro chekeonan. Si bo kier haci tur, bo ta mas cu bon bini, bin trempan, pone bo nomber na tur e stacionnan cu lo tin y asina bo sa cu bo por haci uso di tur e servicionan gratuitamente aki na Aruba Lions Club.”

Henter pueblo di Aruba y esunnan den mas necesidad, ta invita riba diasabra dia 3 di juni pa bini y inscribi pa asina por haci uso di e oportunidad pa ricibi tur e chekeonan medico necesario na un manera hopi mas accesibel. “E invitacion ta pa boso tur, tur nos hendenan cu tin mas necesidad, yega cerca nos paso nos tey pa yuda comunidad di Aruba. Nos tin 75 aña haciendo e trabao aki di curason pa henter pueblo di Aruba,” Magaly a clausura.