Den ultimo luna di aña tabata un luna bastante ocupa pa e club di servicio bon conoci den comunidad, Aruba Lions Club, cu pa mas cu 75 aña ta sirbiendo comunidad cu diferente proyecto pa yuda esnan cu ta den necesidad.
Den luna di december 2023, e club a entrega un cantidad grandi di pakete di cuminda y un regalo di Pasco na muchanan menos afortuna y asina a cera e aña cu otro dos bunita gesto: Brindando un ayudo na esnan cu tin mester di dje.
Pa algun tempo tin un grupo di hoben di scol cu ta pasa nan tempo liber haciendo musica y e hobennan aki tabatin e deseo pa haci un grabacion musical di nan grupo di rock, pa asina por a yega na un produccion cu cancionnan propio y original.
E hobennan aki a acerca Aruba Lions Club y den esaki e organisacion a mira un bon oportunidad pa yuda e hobennan aki y asina motiva nan pa nan sigui riba e bon caminda, y na mesun momento nan por ta un ehempel pa otro hobennan den comunidad. Aruba Lions Club a cubri tur gastonan di e grabacion y den luna den December por a haci entrega oficial di e produccion na e grupo aki, cu ta yama nan mes “The Rokkeros”.
Manera ta conoci, faltando algun dia pa aña termina, un candela feroz a destrui un cas por completo na Santa Cruz y laga un pareha di adulto mayor sin cas y sin ningun pertenencia.
Den un iniciativa pa yuda e pareha di adulto mayor aki, Aruba Lions Club hunto cu otro partner a haci entrega di un suma di placa den forma di voucher cu e pareha aki por busca productonan di prome necesidad durante e tempo dificil aki.
