Recientemente na oficina di Notario Ralph Yarzagaray a keda funda oficialmente Aruba Lifeguard Foundation. E meta di e fundacion y su miembronan ta pa brinda asistencia di prome auxilio na e playanan principal di Aruba. A firma pa e fundacion Sr. Michael Robert, Sra. Valery Eman y Sra. Desireën Rosel. Tur tres ta lifeguard certifica.
E idea ta pa pronto e fundacion cuminsa acerca instancianan importante pa haya nan contribucion.
E fundacion lo enfoca na mantene playanan door di supervisa bishitantenan y brinda asistencia den prevencion y control di incidente y peligernan cu por presenta na playanan pa asina combati casonan lamentabel di hogamento entre nos hendenan local y turista. Aruba Lifeguard Foundation tambe lo enfoca na fomenta y conscientisa comunidad, turista y tur esnan cu ta bishita nos playanan ariba topico manera seguridad, peligernan di lama y asistencia den caso di incidente.
Presencia di Lifeguard ta sumamente importante pa un comunidad specialmente na islanan cu ta rondona cu awa. No solamente ta salba bida den caso di incidente pero ta preveni pa casonan di hogamento sosode na prome luga.
Segun estadistica, hogamento ta un di e causanan principal di fayecimento di turista Mericanonan den exterior. Anualmente, un averahe di entre 15% pa 20% di fayecimento no-natural entre (turista) Mericano den exterior tabata consecuencia di hogamento. Hopi di casonan aki ta debi na falta di familiaridad di entorno y tambe influencia di alcohol. Muchanan cu ta landa den playanan of instalacionnan acuatico sin supervision of adultonan cu ta landa bao di influencia di alcohol tin un riesgo hopi halto di hoga.
Pues, seguridad y prevencion mester ta di maximo prioridad pa motibo cu casonan di hogamento no-fatal (si no fayece) por causa daño interno di organo manera daño di celebro, daño di memoria, ta reduci funcion cognitivo y por crea discapacidadnan pa bida largo pa e victimanan.
Miembronan di e fundacion ta gradici Notario Sr. Ralph Yarzagaray pa su contribucion y tambe na Sr. Aldrich Croes cu a motiva e grupo di Lifeguards pa organisa nan mes den un fundacion cu por yuda salba bida di nos hendenan y di nos bishitantenan na nos playanan.
