Minister di Asuntonan Interno y Reino a contesta riba e lista di palabracionnan entre e cuater parlamentonan di Reino. Nan a yega na e palabracionnan aki durante e ultimo encuentro IPOK.
Esaki ta tuma luga na juni. Tin un cantidad di puntonan. Un ta cu e delegacion parlamentario di Aruba ta pidi Hulanda pa ta envolvi den e cambio di e ley pa trafico aereo cu ta entrega na parlamento Hulandes (Tweede Kamer) pa ubica pistanan unda avionnan mester aterisa, cu ta forma un riesgo mas halto pa traficacion di droga.
Aruba ta pidi pa nan y tambe e representantenan di otro parlamentonan por wordo envolvi durante e tratamento di e ley aki den Tweede Kamer. Manera conoci e parlamentonan di e islanan Caribense Hulandes ta pidi pa hopi tempo caba pa nan por manda representantenan pa sinta den Tweede Kamer momento cu tin leynan riba mesa cu tin consecuencia pa e islanan. Un ley iniciativa di parlamentarionan aki sinembargo no a logra di haya suficiente sosten den parlamento Hulandes. E minister a contesta cu lo warda riba e imput di Aruba y tambe esunnan di e otro islanan pa e ley propone.
Buraco pensioen studiantenan
Un otro punto ta e buraco den pensioennan AOV y AWW cu studiantenan cu ta bay studia pafo, lo enfrenta. Esaki ta conta pa studiantenan di Aruba, Corsou y St. Maarten. Segun e staatssecretaris di Hulanda pa Asuntonan Social nan a regel esaki caba pa studiantenan di e islanan di BES. Hulanda ta bisa si e otro islanan tambe kier cera e buraco aki, nan mes por bin cu un solucion of sigui e ehempel di locual a haci pa e islanan di BES.
Harmonisa y baha e invoerrechten
Un otro punto ta esun di invoerrechten (belasting importacion). E paisnan den Reino pa basta tempo ta discuti pa elimina of baha na entre e islanan Caribense Hulandes. Durante conferencianan di Reino na 2014 y na 2015 a yega na cierto palabracionnan. Entre otro pa forma un grupo di trabou pa inventarisa e beneficionan y e desbentahanan y tambe e condicionnan. Sinembargo te awor e grupo aki no a logra di manda un rapport cu resultadonan.
Discriminacion
Un otro punto riba e lista ta discriminacion y con pa yega na proyectonan pa soluciona esaki. Gobiern di Hulanda ta bisa den e carta cu e contestanan riba e lista di e parlamentonan di Reino cu nan ta haya investigacion riba e topico aki importante. Hulanda a firma un convenio caba cu Aruba pa traha hunto, colectando informacion riba e posicion di hende muhe y LHBTI. Na comienso di e aña aki e oficinanan estadistica di e islanan Caribense a bin hunto pa palabra con nan por traha hunto riba e topico aki y intercambia conocemento y informacion. Gobierno Hulandes ta bisa cu nan lo keda sostene esaki y proyectonan riba tereno di emancipacion y discriminacion.
