Durante palabracion entre ministernan di husticia den Reino na Boneiro (JVO), minister di husticia di Aruba, Andin Bikker (POR) a tuma nota cu e 3 paisnan den Reino menos Aruba tin intencion pa bay haci biahe entre e paisnan posibel banda di paspoort tambe cu un cedula. Aruba lo kier bira participe di e acuerdo aki, pero lo mester tuma tempo pa mira tur loke esaki ta encera.
Segun e mandatario nos paisnan ruman den Reino a bin na un acuerdo pa haci posibel biaha entre e paisnan sin necesidad di tin un paspoort tanten cu tin un cedula. Esaki ta algo cu no tabata conoci pa mandatarionan na Aruba, pues sr. Bikker ta haya e idea uno interesante y lo kier wak con por bay implementa esaki tambe na Aruba.
Pa por haci esaki lo mester cambia leynan local na cada pais, pues ta p’esey e paisnan ta yega na un acuerdo cu e intencion pa implementa esaki pa asina den futuro por mira tur e detayenan. Corsou, Sint Maarten y Hulanda tin e areglo aki, posibelmente pasobra e constelacion cu a forma despues di 10-10-10 a haci cu nos pais rumannan a bira participe di cierto leynan federal (Rijkswetten) cual Aruba no ta forma parti di dje mirando cu Aruba a haya su autonomia via Status Aparte anteriormente.
E mandatario ta haya cu e areglo aki lo por ta beneficioso pa Aruba pues lo ta pidiendo mas informacion riba kico tur lo encera pa bin cu esaki. Ademas di ta beneficioso pa pasaheronan aereo, e mandatario ta indica cu esaki lo por beneficia e proyecto di Fast Ferry imensamente.
Apart di tin e beneficio cu no tin nodo di haci biahe di mas o menos 15 minuut cu un paspoort, parti di e acuerdo ta inclui un sistema di intercambia informacion unda na momento di registracion di pasahero aereo of di Fast Ferry, ya caba lo por determina si e persona ta bon bini na su destinacion.
