“Lamentablemente nos ta awor den e categoria TIER 2 Watch List den e rapport di Departamento di Estado Mericano riba Traficacion di Hende.” Esey tabata e comentario di Minister di Husticia Andin Bikker ayera mainta.

Manera Bon Dia Aruba a ilustra, Aruba a baha den categoria pa motibo cu no a cumpli cu diferente rekisito y un di nan tabata leynan mas pisa pa penaliza abuso di hende.

Segun Minister Bikker, un di e motibonan cu Merca a baha Aruba di categoria den e lucha contra abuso di hende, particularmente traficacion di hende, ta pasobra cu a constata e castigonan na Aruba pa casonan di secuestro y abuso ta hopi mas abao cu den resto di Reino Hulandes.

Bikker a bisa cu e tabata informa for di aña pasa caba cu Merca ta analisando e asunto di leynan penal aki pa evalua e esfuersonan di Aruba pa combati traficacion di hende. Y e momento ey el a yama Professor Hans de Doelder, kende a traha riba e Codigo Penal di Aruba pa puntra riba e nivel di castigo. “M’a puntra e Professor si ta berdad cu e strafnan na Aruba ta mas abao cu otro paisnan den Reino. Profesor de Doelder a bisa cu esey berdad ta e caso, esta cu e strafnan na Aruba ta mas abao. Tempo cu a traha riba e Codigo Penal nobo, Aruba a scoge pa esaki.”

E titular di Husticia a sigura cu ya caba a cuminza trece cambio y cu e ley contra abuso di mucha tabata un paso den e direccion corecto. “Awe mes lo mi emiti un carta na Departamento di Estado pa bisa cu en todo caso ta cumpli cu e criterionan di ley.”

Tambe e Minister a bisa cu unavez cu Aruba tin su Procurador General y tambe su Fiscal Mayor nobo entrante September 1, lo duna Merca informacion adicional. “E bon di e rapport ta cu no solamente e ta duna cifra, pero tambe recomendacion con pa nos por mehora nos evaluacion.” Asina a recomenda pa Gobierno cera acuerdonan cu organisacionnan no-gubernamental, manera Cruz Cora, pasobra esnan cu ta bira victima di traficacion generalmente ta personanan indocumenta y ta e organisacionnan aki ta brinda asistencia pa ayudo humanitario. A base di esaki, Aruba lo amplia su cooperacion cu Interpol y su programa Protege, cu ta diseña pa duna proteccion na personanan cu ta drenta un pais y ta core riesgo di bira victima di traficacion di hende.

“Nos lo cambia tambe nos ley di dunamento di permiso particularmente pa loke ta e mundo di prostitucion.” Segun Andin Bikker, na e momentonan aki, e barnan cu ta brinda entretenimento sexual ta cay bao di e mesun ley cu ta dirigi cualkier otro establecimento cu ta bende alcohol. “Nos lo cambia e ley unda ta tene cuenta specificamente cu esnan cu ta opera den e ambito di prostitucion.”

Minister Bikker a señala si cu e TIP Report 2020 a ilustra casonan di asina yama ‘blind sighting.’ Esta casonan cu no ta conoci pa Gobierno, pero cu a bira conoci pa esnan cu a bishita Aruba y a tende di esakinan. “Nan no a specifica e casonan. E Grupo di Trabao en todo caso no ta conoci cu ningun caso individual. Cualkier abuso cu por tabatin no ta conoci pa nos,” Bikker a reitera.

En todo caso, e ta kere cu Aruba lo ta cla pa mustra cu a haci mehoracionnan debido y cu pa 2021, Departamento di Estado lo duna un miho evaluacion.

Mester bisa si cu manera Bon Dia Aruba a señala, TIP Report 2020 a indica cu berdad Aruba ta trahando pa aumenta castigo pa esnan cu ta comete abuso contra menor di edad (y Parlamento a aproba e ley unanimamente siman pasa), pero cu no a mira cu tin proyectonan di ley unda ta bay aumenta e castigo pa personanan cu ta comete abuso, incluso traficacion di hende, contra esnan cu ta riba 16 aña. E interpretacion di Minister di Husticia cu esaki ta locual Departamento di Estado kier mira, pues ta diferente cu locual a pone den e rapport.

Entretanto e grupo di trabao encarga pa controla traficacion di hende na Aruba a reuni pa analisa e evaluacion. Aunke cu ta cuestiona e forma con Departamento di Estado, bao di e administracion actual a cambia e forma di analisa y e formulacion di e preguntanan, e enfoke ta pa haci uso di e recomendacionnan y bolbe subi den categoria.