Un aña nobo a cuminsa y nos por tin nos dilanti un aña cu por trece cambio. Como medio di comunicacion responsabel y cu e meta di trece noticia corecto y verificabel, nos ta analisa y critica tur cos cu ta pasa den nos pais y cu merece esey. Pero ta bon pa regularmente nos compara nos pais cu otronan, cerca di nos of mas leu, pa nos por posiciona nos mes mas obhetivamente.
E prome comparacion cu ta salta na bista ta naturalmente nos bisiña grandi, cu ta pasando den e temporada mas malo di nan historia. Mientras nos ta importa delaster un cos cu nos mester, y tin e recursonan pa sustenta esaki, nos bisiñanan ta sufriendo di un economia disfuncional cu no ta produci un gran parti di e cuminda cu mester pa alimenta un poblacion di trinta miyon hende. Y no cuminda so, cantidad di otro producto di primera necesidad mester bin di exterior pasobra e pais ya no ta produci nan.
Nos ta keha di nos siguridad cu a bay atras, cu atraco arma regularmente, pero esaki naturalmente no ta nada compara cu e cifranan alarmante di delito cu consecuencia fatal, cu ta pone Venezuela na di dos luga na mundo den e ranking impopular di pais cu mas asesinato o morto violento pa cada 100.000 habitante. Otro pais den nos hemisferio, El Salvador tin e dudoso honor di ta number un, cual ta conta cu mas di 100 asesinato pa aña pa cada 100.000 habitante. Violencia delincuente no ta nada aheno na nos region, lamentablemente, pasobra paisnan manera Colombia te cu algun tempo pasa tabata figura den e top di mundo tambe. Felizmente, nan record ta mehorando cada aña y esey ta refleha su mes tambe den e creciente interes pa turismo na Colombia. Un bon señal cu e resto di mundo a cuminsa reconoce cu e Colombia di awe ta leu di ta e Colombia di binti aña pasa, unda ningun hende tabata bay si bo no mester.
Tin otro pais den nos region, manera Honduras, Guatemala y Mexico cu, al igual cu El Salvador cu ta figura halto riba e lista di pais mas violento. Tur esaki naturalmente liga na narcotrafico, cu den e caso di Mexico a yega na extremo cu polis no por haci mucho sin e apoyo completo di ehercito, cu gradualmente a drenta full den tareanan policial, loke no ta nan trabao.
Otro mal cu e poblacion di Venezuela ta sufri ta e corupcion na tur nivel di gobernacion. Esaki ta haci cu bida ta bira mas caro pa tur hende, pio awor cu practicamente un gran parti di producto ta importa y ta completamente den man di ehercito, unda ta cobra soborno pa cada paso den e trayecto pa yega na e consumidor. Compara cu esey, naturalmente nos pais ta un paraiso di paz y trankilidad. Of no? Bueno, naturalmente nos no conoce corupcion na nivel di nos bisiñanan, pero pa bisa cu e fenomeno ta desconoci cerca nos, ta un poco exagera. Tur cos ta depende di e afan di e autoridadnan concerni pa investiga e casonan di cual nan haya denuncia. Y lamentablemente nos mester bisa cu den esey tin basta pa mehora. Nos sa cu e autoridadnan concerni ta keha di e falta di recurso pa por actua contundentemente, pero al final de cuentas e situacion no ta satisface. Nos no ta bay menciona ehemplo, pasobra ta temporada di optimismo y nos ta laga esey pa ora tin caso concreto.
Ban awor cu un comparacion cu nos bisiñanan den lama Caribe. Di un manera casi tur mescos cu nos ta prospera a base di turismo y hasta den cierto sentido tin di nan ta bay nos dilanti den desaroyo nobo unda nos no ta competitivo, pa un motibo. Por ehemplo, nos ta mira un crecemento grandi den ‘boutique hotels’ di categoria halto, cu ta atrae un publico bastante exclusivo cu no ta haya na Aruba asina facil. Na luga di envidia nan, ban mira pakico e exito ey y kico el a costa. Nos por observa cu e islanan aki ta dedica un parti esencial di nan costa atractivo na e negoshi aki, cu consecuencia cu e partinan ey no ta disponibel mas pa nan mes hendenan.
Aki ta unda Aruba ta distingui su mes pa un mero casualidad historico, unda cu nunca, salvo algun excepcion manera e hafnan, a permiti propiedad priva podera di costa. Nos a lanta como Arubiano cu e pensamento cu costa ta di tur y di ningun. Aruba riba gran parti di su teritorio ta accesibel pa tur hende, bishitante o residente. Esey ta un tesoro grandi cu hopi otro isla no tin. Nos no mester bay leu; na Curaçao por ehemplo e poblacion practicamente no tin liber acceso na costa mas pasobra un gran parti ta propiedad priva.
Aunke nos isla den hopi sentido ta compara faborabel cu otro pais, esey no ta kita cu nos ta keda mira e imperfeccionnan den cas como indeseabel, y esey pa bon motibo. Nos mester keda traha riba mehoracion, ‘no matter what’. Un feliz 2017.
