Despues di un siman di actividadnan y un asistencia di publico cu a bay wak y scucha e poesia di poetanan di diferente pais, tambe nan a comparti un tiki mas di nan talento den tayernan na unda awe Aruba International Poetry Encounter ta yega na su final.
Prome cu e clausura, for di 5or di atardi pa 7or di anochi ta bay tin un tayer den man di Jhon Martinez, ken ta un di e poetanan di e encuentro aki cu a bin for di Peru e cual ta bay siña tocante bukinan artesanal “cartonero”.
Un buki cartonero ta un buki cu e persona por haci’e den su mesun cas y cu no tin mester di un imprenta y otro hermentnan como por ehemplo, un printer.
Awe Martinez ta bay siña con pa cose un buki di estilo Hapones e cual ta e prome punto pa por traha diferente cos artesanal. E idea segun Martinez como todo trabou artesanal ta pa traha cu e recursonan cu personanan mes tin den nan cas na unda por tin carton, pero tambe por decora nan cu telanan.
“Loke nos kier ta pa establece e basenan pa tur persona cu ta interesa sea den literatura of poesia, sino esnan cu ta gusta haci artesania por acerca cerca nos awe y tambe pa personanan por haci nan mesun buki cu materialnan cu tin den nan cas,” el a bisa.
Pa loke ta trata e clausura di e festival, esey ta bay cuminsa 7.30pm na Fundacion Rancho mes unda ta bay tin otro actividadnan como lecturanan interactivo di poesia y musica combina cu e speaker Randall Luidens, ken ta un artista y entrepeneur di Aruba, ademas di e poeta escritor y traductor di Brazil Wilson Alvarez pa discuti ‘Na unda e ritmo y poesia ta separa y ta topa cu otro’ y di otro poetanan, artistanan nacional y internacional cu tambe tabata presente den dianan anterior cu a asisti na e festival aki.
