Segun informacion den medionan di comunicacion local, residentenan di Aruba actualmente no por usa e Aruba Health App pa biaha na Europa. Ainda no tin un solucion pa vincula e sistema di Aruba na esun di Europa.

Esaki segun un relato di e portal noticiero online, aruba.nu.

Manera Bon Dia Aruba a publica den su edicion dia 23 di december ultimo, Aruba tabata e prome pais pa suscribi na un app pa certificado di vacuna y test di coronavirus, cu CommonTrust Network. CommonTrust Network a firma Aruba como su prome pais miembro, un victoria den e careda pa desaroya un paspoort di salud digital. Pero e tempo aya ainda tabatin otro paspoort di salud digital cu tabata competiendo pa bira e standard mundial. E dos lidernan den desaroyo tabata CommonPass, sosteni pa Foro Economico Mundial, y Travel Pass, di Asociacion Internacional di Transporte Aereo (IATA). Ambos esencialmente ta haci mescos: genera un QRcode unico cu status Covid-19 di un biahero pa usa na momento di aborda un vuelo y yega na otro pais.

Pa residentenan di Bonaire, St. Eustatius y Saba, for di dia 1 di juli proximo lo por haya nan informacion di vacunacion y test disponibel via e app Europeo, Coronacheck. Segun aruba.nu, ta desaroyando un website unda por upload documentonan di vacunacion. Esaki a keda aproba siman pasa den Tweede Kamer.

E votacion pa e regulacion a tuma luga despues di un debate siman pasa den cual minister encarga cu Salubridad Publico, Bienestar y Deporte, Hugo de Jonge a duna un splicacion. Door di vincula e app Coronacheck cu e futuro Certificado Digital di Corona (DCC) di Union Europeo, por usa e app cuminsando dia 1 di juli pa biaha dentro di Europa.

Pa e uso di e app Coronacheck, den principio tin mester di un number di servicio ciudadano BSN y e codigo di identificacion digital Hulandes, DigiD. P

Pero door cu Aruba, Sint Maarten y Corsou ta paisnan autonomo dentro di Reino Hulandes, e situacion di nos ciudadanonan ta mas complica. Esaki pasobra residentenan di e islanan aki no tin un DigiD, esta un codigo di identificacion digital Hulandes, loke ta haci e vinculo cu e app uno dificil.

Autoridadnan Hulandes actualmente ta buscando un solucion pa esaki.