Diasabra anochi na Flor di Oriente poeta y escritora local Yakari Gabriel a tene un celebracion pa conmemora su prome buki di poesia publica: Cold Coffee. E koffie friu tabata pa e grupo di fans y amistadnan cu a logra haya un copia di e buki firma refrescante manera un bebida friu den desierto.
E analogia aki ta referi na e manera con e escritora ta scoge pa papia tocante e temanan cu ta toca den su trabou. Semper cu un honestidad cu ta refrescante, particularmente pasobra ta papia bon cla y sin restriccion tocante temanan di inmigracion, racismo y experiencia di ta un muhe den sociedad contemporaneo. No ta tur dia un texto di e tipo aki ta bin den existencia, particularmente den un bos cu ta refleha e experiencia Caribense di un muhe cu ta ‘black, immigrant and proud’.
Durante e anochi por a mira un grupo diverso di persona cu sea a pasa cumpra buki y sigui nan caminda of a keda pa experiencia un anochi yena cu musica y poesia. Durante e anochi 3 poeta ‘hopi cerca di curason’ di sra. Gabriel a haya e honor pa por comparti e mic cu e escritora. Luis Villegas, Ruthy Vrieswijk y Maria Silva a presenta algun poema, tanto poesianan personal como tambe di sra. Gabriel. Sra. Gabriel a expresa su gratitud pa por tene e evento y por a mira un acogida asina caluroso di parti di habitantenan di nos isla. E escritora par di siman pasa a estrena su buki na Hulanda unda e ta studiando media y comunicacion.
Un mensahe principal cu sra. Gabriel a hiba dilanti durante su oracion tabata ‘hopi biaha persona kier tin expectativa di bo’. Aki referiendo na e echo cu su persona no solamente ta poeta si no ta un artista multi facetico primeramente den rango di skirbimento pero tambe cu otro interesnan fuera di esaki. Ademas e artista a expresa cu hopi biaha ‘ora bo ta artista hende ta lubida cu bo ta humano tambe’.
Nos redaccion a acerca un persona cu a comparti su pensamentonan riba e evento y riba e buki, cual e di cu e lo lesa cu entusiasmo despues di e evento: musico y DJ pa e evento Marc Erasmus. Sr. Erasmus a expresa cu e problemanan social cu nos ta enfrentando como pais ta un proceso den cual lo bin cla tur e cosnan den e onderbuik cu no ta wordo exponi. Pero segun e musico, cu tin interes grandi den psicologia, cosnan manera e buki di Cold Coffee di sra. Gabriel lo por y lo mester hunga un rol mas grandi den tanto enseñansa como terapia. Esaki debido na e bos cu ta resona di un persona cu maske a haya hopi adversidad den su caminda por a acepta su heridanan y haya paz den esaki. Mescos cu un di e famoso palabranan di sra. Gabriel: “Nothing was ever as liberating as forgiving myself.”
