‘Aruba a ground nos pa motibo di debe di belasting’

Despues di e conclusionnan desaster di inspeccion Hulandes y tambe di Aruba riba e companianan di InselAir na Aruba y Corsou, e aerolinea a reacciona ayera cu nan avionnan ta ‘safe to fly’. Pero mas interesante ta cu nan ta acusa e departamento di inspeccion di Aruba di ground e avionnan pa motibo di debe di belasting.

“Na niun di e dos aerolinea e autoridadnan di aviacion a constata cosnan tecnico y operacional grandi, pendiente. E suspension di e flota di MD na Aruba tin di haber cu e posicion di e autoridad di aviacion di Aruba pa sostene e decision di gobierno di Aruba pa freeze e cuenta bancario di e aerolinea pa motibo di retrasonan di pago di belasting.”

Den un reaccion cortico riba e acusacion di InselAir e autoridad di aviacion civil DCA ta informa Bon Dia Aruba cu tabata otro factornan tambe cu a conduci na e decision pa ground e avionnan. E debe di belasting a acumula na mas cu 2 miyon florin y InselAir Aruba tabatin un areglo cu e departamento di belasting. Sinembargo esaki no ta caso mas y aunke e aerolinea a pidi pa un areglo pa preveni e findishi diabierna awor di e inventario di e compania (exlcui e avionnan), e departamento di belasting a nenga esaki.

Segun e relato cu InselAir amanda ayera nan companianan na Aruba y Corsou semper ta reacciona di biaha riba cualkier cos e autoridadnan di aviacion a haya, tumando medidanan pa coregi nan pa asina haya aprobacion di e autoridadnan. E compania di aviacion tambe ta bisa cu nan a topa cu e inspectornan Hulandes. “Nan a pidi pa audit spontaneamente y nos no tabatin problema cu esey. Contrario na locual a sali den prensa, ambos aerolinea (InselAir na Aruba y Corsou) no a ricibi e resultadonan di e inspeccion Hulandes cu tin su efecto riba nan operacion di vuelo.”

Segun InselAir, e inspectornan di Hulanda a mustra durante nan bishita cu nan tabata ‘pleasantly surprised’ cu e resultadonan riba e terenonan di operacionnan aereo, operacion di e control center, siguridad, training, planificacion, calidad y mantencion di InselAir Corsou. Segun e compania e audit independiente di e inspeccion Hulandes a duna e gerencia di ambos aerolinea ‘a further high level of comfort’ pa cu e calidad di supervision cu nan mesun personal ta haci.