Personanan ilegal na Aruba cu a comete un of mas delito y ta deteni na KIA ta costando Aruba un cantidad di placa sin cu comunidad mes tin un beneficio di esaki.  E motibo di esaki ta cu despues di sinta nan castigo aki na Aruba, nan ta wordo deporta per direct.

Durante un entrevista cu Bon Dia Aruba tabata tin cu parlamentario Rocco Tjon (MEP), e ta splica cu den su experencia durante su tempo como director di KIA, tin varios ‘asunto’ cu ta impedi e instituto di draai mas miho y placa sigur ta un di factornan aki.  E parlamentario ta bisa cu KIA tey pa coregi un detenido pa asina e ta un miho persona pa nos sociedad pero tambe tin hendenan cu nos ta paga pa nan ta miho, cu na final di dia no lo keda aki na Aruba. Cuanto e suma exacto ta, e parlamentario a prefera di no divulga ya cu e no ta mas den e funcion y no sa kico e cifranan actual ta.

“Laga nos tuma por ehempel un persona ilegal cu a comete un atraco, e ta wordo condena na 4 pa 8 aña di prizon, e ta sinta su castigo aki y pa ora e caba di sinta su castigo, e ta wordo deporta.” E parlamentario ta splica cu bo ta inverti den un detenido cu e intencion pa e re-integra bek den comunidad ( ya cu esaki ta e meta di KIA) pero esaki pues no ta e caso cu un persona ilegal. E situacion aki sr. Tjon ta cualifica como algo ineficiente. Mas leu ainda, sr. Tjon ta splica cu gastonan medico ta wordo kita directamente for di e presupuesto di KIA ya cu e personanan aki no ta bin na remarce pa AZV. “Pues bo por imaginabo e gasto halto cu nos tin cu core cu ne pa un pashent cu ta tuma dialyse.”

Tratado y victima
A puntra e parlamentario si no ta mas facil pa djis deporta e persona di biaha ora cu gare y kico e lo haci awo cu e ta den un posicion na unda cu e mes por bin directamente cu iniciativa pa haci cambio den ley.

Segun sr. Tjon e ta un materia basta amplio ya cu tin tratadonan cu Aruba ta mara na dje di cual no ta hacie facil pa bo por yega deporta un persona. “Si el a comete un delito aki, e mester sinta e castigo aki. Mester wak si tin of si por yega na acuerdonan cu paisnan di unda e personanan aki ta bin pa asina nan sinta nan castigo na nan propio pais.” Sr. Tjon ta splica cu e tema aki ta algo cu el a papia di dje activamente durante campaña y e tin su atencion riba esaki. Na e momento aki cu e situacion financiero cu Aruba tin, e no tin duda cu mester sondea tur posibilidad pa hacie posibel pa por saca un detenido asina mas lihe cu ta posibel for di Aruba, ya cu esaki lo trece un alivio financiero.

Locual si e parlamentario ta bisa cu mester tene cuenta cu ne ta cu cada caso ta diferente y tin cu tin victima envolvi. E ta bisa cu e por imagina cu un persona cu ta victima di un atraco, lo kier pa esun responsabel sinta su castigo aki mes. “E tin di haber cu su sentimiento  y aspecto ey tambe bo mester keda tene na cuenta.”

Ilegalnan Venezolano
Sr. Tjon ta bisa cu den su periodo como e director di KIA, gran parti di e detenidonan ilegal ta procedente di Venezuela. Segun e ta bisa, esey riba su mes ta un obstaculo ya cu e situacion di nos pais bisiña no ta esun di mas miho na e momento aki y e no ta kere cu lo por yega facil na un acuerdo cu nan pa tuma detenidonan procedente di nan pais bek.

“Tur hende sa con e relacion ta na e momento aki entre Venezuela y islanan ABC, pues mi no ta wak e cu pa awo nos lo yega na algo cu nan”, e ta bisa.  E parlamentario ta finalisa bisando cu igual cu el a bisa den campaña, e lo sigui bisa formulanan pa haci procesonan mas eficiente, menos burocratico y cu por genera placa na luga di costa pueblo un dineral.