Aruba Food & Beverage Association (AF&BA) a ofrece un conferencia di prensa ayera mainta pa presenta su hunta directiva nobo y ademas trece dilanti nan proyectonan y e importancia cu educacion tin pa nan miembronan.
Simi Chugani PR di AF&BA a splica cu Jan van Nes tabata e presidente di e asociacion aki pa varios aña na unda el a dedica su tempo pa industria hotelero di Aruba, asina mes el a bisa cu e no ta retira totalmente di AF&BA sino cu e lo keda como un consehero pa e hunta.
E intencion pa e asociacion ta pa ta uno mas inclusivo den mayor sentido pa restaurantnan, café, barnan y tambe trucknan di cuminda, Daniele Ferrara a wordo presenta como e nobo presidente di e asociacion aki.
Di su parti, Ferrara a menciona cu nan ta contento cu nan tin varios miembro nobo y den e hunta tambe, nan tin e meta pa restructura e asociacion di un cierto manera pa asina ta mas inclusivo y no pa ta solamente como un asociacion cu ta representa doñonan di trabou y restaurantnan sino lo cual ta full e sector di Food and Beverages di Aruba.
“Nos ta buscando pa unifica e voz di lo cual ta Food and Beverages cu ta hopi importante specialmente den e temporada aki, no solamente pa lo cual nos ta bibando aworaki pero tambe pa e mercado di Food and Beverages na Aruba pa subi e nivel di calidad di producto”, Ferrara a sigura.
Nan foco pa e restructuracion aworaki ta pa nan fix cu gobierno loke ta trata reformanan y diferente cos mirando cu lo tin un temporada cu bastante reforma pa e proximo lunanan of añanan manera nan ta supone.
Tambe nan kier yuda den e parti di educacion pa lo cual ta full e sector di Horeca, prome cu pandemia Covid-19 Ferrara a bisa cu nan tabata representa aproximadamente 5.000 empleado pero door di e crisis nan ta pensa cu esey a wordo reduci un tiki, “no hopi door cu algun a haya subsidio di salario” pa asina yuda e trahadonan di Horeca y mehora nan calidad di trabou, subi e nivel di servicio na Aruba y brinda nan apoyo pa nan mehora nan conocemento.
Di loke ta trata e miembresia, Ferrara a splica cu nan ta haciendo cambionan pa prijsnan pa aña 2022 pa ta mas accesibel pa tur hende, ademas, el a sigura cu no ta solamente pa bira miembro di AF&BA sino cu tambe e parti di educacion ta algo hopi importante.
Asina mes, el a bisa cu miembronan di asociacionnan como Comerciantenan Uni, ATA y AHATA no a wordo afecta pa loke ta e medida cu gobierno a implementa pa evita mas casonan di Covid-19 cu ta toque de queda, Ferrara a declara cu esey ta afecta AF&BA hopi fuerte.
El a informa cu nan tin bon comunicacion cu Gobierno di Aruba na ora cu nan ta manda cartanan of nan pidi afspraak pa reunion, na e momentonan aki nan a bin papiando cu Crisis Team pa loke ta e toque de queda.
