Diamars ultimo den reunionnan cu ta tumando luga cu formado di gobierno hunto cu diferente stakeholders, Aruba Financial Center Association (AFCA) tabata un di e invitadonan cu a trece dilanti cierto peticion pa e proximo gobierno como por ehemplo, tin mas comunicacion entre nan banda.
Stanley Looman a expresa cu e reunion cu formado prome minister demisionario Evelyn Wever-Croes a bay bon, nan a trece nan puntonan dilanti di e cual tin tres cu nan ta considera como principal, e prome ta cu nan ta pidi mas comunicacion y dialogo continuo cu e gobierno cu ta bay sinta, e cual segun el a sigura a wordo acepta.
Di mesun manera, el a menciona cu nan tambe a papia riba puntonan di Banco Central y Landsverordening Bestrijding Witwassen en Terrorisme Financiering (LWTF) e cual el a sigura cu “nos tur ta respeta y nos tur ta mantene nos na reglanan di LWTF nos ta kere cu ta masha bon y no solamente pa sector sino pa Aruba” el a bisa.
Nan punto di Banco Central tabata si e maneho di handhaving di LWTF ta hopi fuerte y fuera di tur proporcion e cual no por ta mas suave y mas flexibel, ademas cu por trece hopi mas beneficio pa Aruba tambe.
E di tres punto cu nan a papia riba dje cu formado tabata tocante ki producto nobo lo por bin cune pa promove y pone e sector financiero crece e cual tambe nan a yega na areglonan cu formado y cu gobierno cu ta bay sinta lo haci follow up riba esey tambe, nan a papia di un producto nobo cu ta e VVA e cual nan ta acepta pero e manera con ‘economic substance’ cu nan tin cu tene na cuenta cune ta hopi mas fuerte y stricto cu tur otro hurisdiccion cu tin akinan den Caribe.
Di loke ta trata e peticion di tin mas contacto ora gobierno nobo lo sinta, nan ta considera esey necesario pa motibo cu por haci un bon contribucion na economia di Aruba y di otro banda, nan ta pidi esaki door cu pa decadanan nan no a wordo reconoci ni a wordo acepta nan consehonan tampoco.
“Pa e motibo ey mi ta kere cu nos kier pa e comunicacion keda mas continuo cu gobierno”, Looman a comenta.
Den cambionan cu a tuma luga den leynan, Looman a splica cu den pasado nan a duna nan contribucion pero nan nunca a wordo reconoci como tal, el a sigura cu tocante e reunion cu formado y otro personanan cu tabata sinta den e reunion nan a mustra nan interes den nan sector y esey ta pone cu nan tin speransa cu lo ta asina. Di nan banda, nan ta espera di por trece cierto cambionan hunto cu gobierno pa finanzas den general.
“Si mas placa ta drenta caha ta mas miho pa pais Aruba y esey mi ta kere ta un di e puntonan cu sigur nos como sector por tin un contribucion grandi den dje”, el a declara.
Tocante e codigo cora cu Merca a pone pa turismo na Aruba cu ta afecta e pilar fundamental di economia, Looman a señala cu nan ta kere cu sector financiero si lo haya apoyo di gobierno y di Banco Central “nos por duna un contribucion grandi pa Economia di Aruba” el a finalisa.
Te cu diaranson ultimo, formado a reuni cu un total di 86 stakeholders den cuatro siman, di loke tin di haber cu reunion cu AFCA el a bisa cu nan a presenta diferente retonan cu tin pa cu e industria di off shore, industria financiero na Aruba na unda segun el a sigura, AFCA a duna mas animo pa duna un contribucion activo na unda nan a palabra un follow up meeting na luna di september e ora cu nan lo presenta nan proposicionnan mas concreto.
Pa e siman aki no lo tin mas reunion cu stakeholders manera formado a trece dilanti den su ultimo conferencia di prensa y cu nan lo tin algun otro den agenda ainda na unda lo sinta cu nan otro siman pa di e manera ey por finalisa e parti di formacion segun Wever-Croes a manifesta.
