Ayera tardi un proyecto cualifica como historico a keda inaugura oficialmente di parti di ANSA (Air Navigation Services Aruba). Ta trata di un sistema di radar sofistica pa supervisa e trafico aereo den nos area.

Ariba dos screen grandi instala den sala VIP di aeropuerto Reina Beatrix, un grupo di invitadonan por a presencia e momento ora cu un avion di Delta procedente di Corsou a drenta nos espacio aereo, y con nan a wordo visualisa, tuma contact cu nan y guia debidamente pa e controlado aereo Jonathan Croes for di toren di control. Antes esaki no tabata posibel. Tur cos tabata antes a base di calculacion.

Sistema di radar
Director di ANSA, Nilknarf Kock a bisa cu e inauguracion di e proyecto di radar yama tambe como surveillance system ta historico ya cu pa añanan ta wordo papia pa bin cu un radar pa Aruba, y finalmente el a bira realidad. Aruba ta pionero den e uzo di e sistema aki tanto den nos region Caribe como na Latino America.

Segun sr. Kock e introduccion aki lo trece mas siguridad den nos trafico aereo y mas productividad specialmente den temporada druk di operacion aereo. Danki na e surveillance system aki nan por guia mas safe y aloca mas avion den nos aeropuerto.

Sr. Kock a bisa cu e proceso aki tabata uno compleho y dificil. E ta un proyecto cu hopi aspecto operacional y tecnico.  E cursonan mes  tabata uno dificil y a demanda hopi esfuerso di e controladonan aereo. Pero cu hopi orguyo el a bisa cu nan tur a logra.

E ta un proyecto cu a cuminsa na maart 2015 ora cu un delegacion di Aruba a bay participa den un congreso na Madrid (Spaña). Eynan nan a topa cu representante di Thales Group. E ta un compania cu ta fabrica y suministra ekipo di nabegacion y comunicacion aereo y espacial.  Bon Dia Aruba por a averigua cu e compania Frances aki antes tabata carga e nomber di Thomson-CSF.

Reto y logro


E tabata un reto segun sr. Kock pa pone den operacion e radar aki den tempo record. Ya cu no solamente ta trata di instala e sistema, sino di duna training y capacitacion na e controladonan aereo.

Nan a pone tur nan esfuersonan disponibel despues cu nan a firma un contract cu Thales Group na september 2015 pa loke ta e compra,  instalacion, integracion y training di e sistema di radar aki.

E instalacion a cuminsa na februari 2016 y a bin cla cu e bon colaboracion cu ANSA a ricibi entre otro di Setar. Mientras cu na mei 2017 nan a cuminsa cu e curso teoretico. Despues nan a sigui durante luna di juni y juli e curso di supervision y maneho di e sistema. E cursonan aki a tuma luga na Aruba y tambe na Trinidad.

Na augustus ultimo e training intensivo a sigui teniendo na cuenta cu algun di nan personal no a yega di traha cu radar. Tambe departamento di Aeronautica Civil a percura pa nan cumpli cu tur e rekisitonan exigi pa sigura e calidad di e cursonan. Eynan nan a siña con pa traha cu e sistema aki cu ta uno totalmente digital.

Nan a siña con pa ahusta e parameter di e sistema y tambe nan personal tecnico a siña riba e parti tecnico aki. No tur cos a caba ainda. For di e luna aki te cu entrante 2018, nan lo haya un training durante nan trabou bou un mentor y/of guia di un instructor di trafico aereo certifica. Director di ANSA ta informa cu pa fin di januari 2018 tur nan controladonan aereo lo ta certifica riba operacion di e tipo di sistema aki.