Mediante un conferencia di prensa, minister di Asuntonan Economico, Comunicacion y Desaroyo Sostenibel Geoffrey Wever a informa cu e presidencia di e raad van bestuur di Aruba Fair Trade Authority a keda den man di Roly Sint Jago.
Minister Wever a anuncia cu Aruba Fair Trade Authority ta un organo cu ta implementa pa ley y cu mester di preparacion door di gobierno ken a haya asistencia pa esaki cu fondonan di landspakket di Hulanda pa implementacion di esaki na Aruba.
Asina mes, minister Wever a declara cu nan a institui un comision independiente pa papia di candidatonan, a scoge nan y na final su persona encarga como minister a haya un propuesta di ken tabata e miho candidato den concepto y asina nan a nombra Roly Sint Jago como presidente.
“Esaki ta un organo hopi importante pa competencia husto na Aruba, un organo cu den futuro pueblo la bay ripara kico e balor agrega ta di Aruba Fair Trade Authority y e ta percura na cuminsa pa tene hendenan cualifica, cu tin e conocemento pa por guia un organisacion asina aki.” Minister Wever a sigura.
Di su parti Sint Jago a señala cu su persona a studia Economia Social na universidad di Amsterdam, el a bin Aruba back na aña 1977 y a traha na Asuntonan Economico como hefe suplente y despues di 7 aña den gobierno el a bay den sector priva caminda el a bira director di un compania multinacional Caribense, despues di esey el a lanta su mesun compania y na aña 1998 pa aña 2000 e tabata director di Finanzas di Aruba.
Como e persona cu a ser nombra como presidente di e directiva di Aruba Fair Trade Authority, Sint Jago a bisa algun palabranan indicando cu e implementacion di e autoridad a drenta den su ultimo fase caminda por finalisa tur preparacion cu a ser haci den Aruba Fair Trade Authority, den ultimo fase aki mayormente asuntonan practico tin cu keda regla, ta intencion pa trata den fin di aña aki pa Aruba Fair Trade Authority ta completamente operacional.
E fase di implementacion aki a tuma mas cu un aña manera Sint Jago a sigura, unda minister Wever a haci lantamento di un Aruba Fair Trade Authority cu tambe ta conoci como AFTA “un di su prioridadnan di mas grandi.”
E ley pa autoridad aki esaki por opera a keda aproba pa Parlamento di Aruba na juli di 2020 y e meta di AFTA ta pa realisa un igual perspectiva pa competencia entre companianan, es decir, un level playing field y tambe pa stimula iniciativanan y aumenta oportunidad di sobrevivencia pa entrepeneur nobo, tambe pa promove innovacion di tal forma cu por yuda diversifica economia.
Den lunanan cu ta sigui e contenido di e ley y manera di traha ta bay bira conoci pa medio di sesionnan di informacion cu tur stakeholders y publico en general, ademas Sint Jago a menciona cu lo tin investigadonan profesional den su servicio cu a haya training specifico.
