Dialuna merdia, Prome Minister Evelyn Wever-Croes a ricibi bishita di Minister di Relacion Exterior di Surinam, Albert Ramdin. Mirando cu Surinam ta traspasando un momento di stabilidad y na caminda, tin e oportunidad di gas y petroleo na 2027-2028, ta pone cu Surinam ta keda un pais hopi interesante pa Aruba haci negoshi cune.
Pa e motibo aki, Prome Minister na varios ocasion a extende un invitacion na Minister Ramdin pa bin Aruba pa reuni riba e diferente posibilidadnan di cooperacion.
Durante e reunion, a delibera riba varios punto na unda Aruba cu Suriname lo por traha hunto. Un di e puntonan ta, cu Suriname por exporta, pa Aruba importa fruta, berdura, y pisca. Tambe, Surinam ta hopi interesa den exporta pa Aruba, pero pa por logra esaki, e gobiernonan lo mester yega na otro pa wak con por facilita e procesonan aki. Importante tambe ta pa trece e sector priva di Aruba hunto cu e sector priva di Surinam pa mira si tin interes di parti di Aruba pa importa e productonan aki.
Prome Minister a expresa di ta contento di por tabatin e oportunidad di reuni cu Minister Ramdin. Minister Ramdin, den nomber di Prome Minister Chandrikapersad Santokhi, a extende un invitacion na Premier Wever-Croes, pa bishita Surinam pa concretisa e palabracionnan aki. Gobierno di Aruba tambe a manda un invitacion na Prome Minister di Surinam pa bishita Aruba. E biahenan aki lo wordo concretisa e aña aki.
Prome Minister a indica cu e meta di Gobierno ta pa logra cu e progreso cu tin aki na Aruba por traduci su mes den bienestar den cada hogar. Costo di bida ta hunga un rol grandi pa e comunidad, y p’esey Gobierno ta comprometi pa haci tur loke ta na nan alcance pa yega na productonan di calidad na un miho prijs.
“E bishita di Minister Ramdin tabata uno exitoso. Durante su bishita, el a logra haci diferente palabracionnan cu demas ministernan aki na Aruba. Tambe, Gobierno a logra haci palabracionnan di cooperacion entre Aruba y Surinam riba diferente nivel pa asina logra mas progreso y bienestar pa e comunidad” Prome Minister a expresa.
Di mesun manera, Minister di Turismo y Salud Publico Sr. Dangui Oduber a reuni cu Minister Ramdin di asuntonan exterior na Surinam, Sr. Tewarie di TMS Global, Sr. Gonesh CEO Surinam Airways y tambe cu Sra. Zuiverloon Consul Generaal di Surinam cu ta residencia na Corsou.
Un reunion unda a elabora ariba diferente topiconan manera colaboracion entre Surinam y Aruba, mehoracion di relacion, posibilidadnan di intercambio pa turismo, intercambio di personal pa cuido medico y posibilidadnan pa mas rutanan di vuelo di Surinams Airways pa Aruba.
Minister Dangui Oduber ta expresa den un comunicado di prensa cu reunionnan asina ta importante pa sigui conoce di cerca e mercadonan di nos islanan den Caribe pa asina por explora posibilidadnan y oportunidadnan cu paisnan manera Surinam por ofrece.
Minister Dangui Oduber ta expresa su gratidud p’e bishita y ta spera cu pronto lo por colabora y intercambia den diferente area manera salud publico pero tambe cu turismo.
