Durante un conferencia di prensa ayera tardi, Aruba Excellence Foundation (AEF) y EduCampus Aruba a anuncia nan colaboracion y a firma un Memorandum of Understanding (MOU) pa hunto a traves di Aruba Certification Program (ACP) facilita e Aruba Heritage Program pa e studiantenan di EduCampus siña mas di e cultura y historia di Aruba.
Pa basta tempo caba AEF ta sondeando e miho manera y miho colaboracionnan pa inclui e informacion di nan programa di certificacion den e curriculum di scolnan na Aruba, cuminsando di kleuterschool te na voortgezet onderwijs. Actualmente nan tin colaboracion cu algun scol di voortgezet onderwijs como tambe E.P.I y Universidad di Aruba y aworaki cu EduCampus cu ta un plataforma di enseñansa nobo cu ta ofrece un curriculum online.
Pa media di e programa di certificacion AEF su trainernan online lo duna e studiantenan di EduCampus e teoria tocante ACP y ademas tambe den e siguiente siman nan lo conecta tripnan pa e muchanan cu e teoria cu e studiante a haya e siman prome y asina lo tin seis sesion te ora cu e muchanan y hobennan wordo certifica como embahador di Aruba.
Sharissa Wever-Croes, Program Manager di Unit Elementery y Middle A di Edu-Campus ta splica cu EduCampus tin 150 studiante y ta un “online homeschooling system” locual kiermen cu e muchanan ta bay cerca e maestronan y nan ta coachnan riba e plataforma.
El a sigui splica cu despues di esey nan tin un parti a-sinchronisa y sincronisa, locual ta significa cu apart cu e mucha ta haci su lesnan online, e mes hunto cu su colega ta encarga cu diferente habilidadnan pa bida (life skills) unda cu nan ta siña con pa funciona despues como un persona individual den comunidad.
Segun Wever-Croes a splica EduCampus ta un sistema di enseñansa online y no ta tur mucha mester t’ey presente, pero nan tin un sistema hinca den otro cu por ehempel muchanan tin cierto dia cu nan tin nan deporte, tin cierto dia nan tin musica of arte y ta hopi varia. EduCampus ta enfatisa cu e parti social ta hopi importante y nan combina esaki den un sistema innovativo cu. “E muchanan ta bin, pasobra bo mester tin toch un autoridad riba nan, pero tambe e parti social di comparti den grupo tambe ta hopi importante”, el a agrega.
Na EduCampus tin tres manera di traha. Nan tin e sistema hibrido, caminda e muchanan ta bay cerca e docentenan na campus, nan ta traha online y nan ta haya e parti di lifeskills. Tin e parti online cu e studiante ta traha les na cas y e progreso di e studiante ta wordo monitorea door di e docentenan. Y nan tin tambe e parti independiente, cual ta ora cu e studiante ta traha completamente riba su mes. Pero un hende ta monitor esey y cada seis luna e ta haya un sesion di informacion ariba su progreso.
Sr. Edgar Croes, presidente di Fundacion EduCampus tambe a agrega cu EduCampus Aruba ta un sistema nobo di enseñansa cu tin dos aña di existencia. “Nos kier a bin cu algo diferente pa e muchanan, no algo tradicional. No ta solamente cu e ta online, pero e ta innovativo tambe y nos kier geef aan cu na EduCampus e mucha ta central. E mucha ta central den e contexto cu e desaroyo di e mucha ta primoridal cerca nos. E desaroyo bo tin cu wak conhuntamente cu su habilidadnan. Esey ta e enfoke grandemente di EduCampus”, el a splica.
Segun el a indica e nivel di EduCampus, ora cu un mucha caba EduCampus, e diploma cu e mucha ta ricibi ta Mericano pero si compare cu e sistema tradicional di enseñansa di Aruba na Hulandes e ta na un nivel di HAVO/VWO.
El a enfatisa tambe cu e mucha ta scoge su caminda pa cana, caminda e ta sinti agradabel. E muchanan ta cuminsa ricibi les cu EduCampus cu ocho aña y eigenlijk, segun el a indica, no tin un edad cu nan mester caba nan estudio pasobra cada mucha ta bay na su tempo, na ritmo di su desaroyo den locual cu e ta sinti su mes bon. El a remarca cu den e contexto ey EduCampus ta innovativo y cada mucha ta diferente.
“Esey ta e parti mas importante pa mi caminda cu hopi biaha bo ta haya e sistema tradicional, bo ta den un trein y bo tin cu cumpli cu cierto rekisitonan, siendo cu na EduCampus tur cos ta cana na e ritmo di e mucha. E mucha ta central, no ta e sistema ta determina e mucha. Ta e mucha tin cu scoge su caminda di cana, cu ta pone y en berdad algun rekisito, pero esey pa nos ta e parti mas principal cu ta e enfoke grandi cu nos tin”, Sr. Croes a señala.
El a remarca cu e MOU ta importante pasobra e idea tras di e colaboracion aki ta encera cu, aunke e diploma di EduCampus ta Mericano, e lesnan ta na Ingles y e material ta di Merca, pero no por lubida cu ta EduCampus ta na Aruba. “Loke nos kier haci ta hunto cu Aruba Excellence Foundation nos kier concentra ariba kico ta nos flora, kico ta nos fauna, kico ta nos historia, servicionan cu nos por brinda, amabilidad, nos turismo, y di akinan e ora ey e muchanan por haya un idea y nan por enfoca ariba e cosnan local”, el a subraya.
