Aruba ta entre e top 5 paisnan rond mundo cu e indice mas halto di pashentnan dialisa,  asina dokter Zaheeb Choudhry a  declara.

Rond mundo un averahe di 195 miyon di hende muhe ta sufri di problemanan di riñon cu ta conduci na morto prematuro si nan no ricibi e cuido medico esencial of logra un transplante di riñon na tempo. Mientras cu den nos pais e problema aki no ta grandi sino cronico.

Ayera a wordo conmemora tanto dia di hende muhe como dia mundial di riñon. Y e no ta puro casualidad. E cifra di pashent mas halto cu problema di riñon ta e ser femenino. Sr. Choudhry ta un  specialista internista y nefrologo na hospital kende a duna datonan cu ta pone nos reflexiona riba problemanan relaciona cu riñon. El a participa durante un conferencia organisa pa Jurette Croes kende ta promotor di salud di departamento di Salubridad Publico.

E tema di e aña aki pa cu dia mundial di riñon ta ‘kidney & woman health’ cu ta riñon y salud di hende muhe. Sra. Croes a splica cu investigacion a mustra con hende muhe tin un tiki mas riesgo di haya problema di riñon cu hende homber. P’esey riba e dia aki organisacionnan di salud rond mundo ta haci diferente actividad pa crea conscientisacion riba e importancia di e riñonnan, y Aruba no ta un excepcion. Departamento di salud hunto cu Imsan,  Hospital Horacio Oduber y  Kidney 297 lo bay dedica henter luna di maart, pa asina trece mas informacion riba e topico aki.

Problema di riñon na Aruba
Nos riñonnan ta organonan hopi complica y asombroso cu ta haci e trabou esencial pa mantene nos curpa saludabel. E trabou principal di e riñonnan ta pa saca toxico y awa cu ta di mas for di nos sanger. E riñonnan tambe ta pa yuda controla e presion di sanger, ta produci celnan di sanger cora y ta mantene nos wesonan saludabel.

Ta asina cu teniendo na cuenta cu Aruba tin un poblacion di alrededor di 110 mil habitante,  e isla aki tin un di e cifranan di mas halto di incidentenan di malesanan di presion halto, obesidad y problema cu riñon. E tendencia aki ta sigui crece y ta algo cu nan como profesionalnan ta masha preocupa cun’e.

Sintomanan
Na momento cu e organo aki no ta suficiente bon mas e ta cuminsa manda algun señal cu bo mester tene cuenta cu ne. E persona ta cuminsa sinti algun sintoma manera cansancio, rosea cortico, grawatamento, falta di apetit y pianan ta hincha.

Si bo tin un di e malesanan cu ta haci bo mas vulnerabel pa haya problema cu riñon, trata di controla e malesanan  y consulta bo dokter. Otro causa ta e uzo di pildonan pa dolor den combinacion cu remedi pa presion halto. E combinacion di e dos nan aki ta haci cu bo riñonnan por bay atras rapidamente. P’esey sr. Choudhry a anuncia cu nan cuminsa un programa hunto cu boticarionan pa evita cu e hendenan por cumpra pildo di dolor libremente, si nan ta uza e remedinan menciona.

Problemanan di riñon por conduci cu na un edad prematuro bo por muri si no haya yudansa medico optimal of den casonan extremo no haya un transplante di riñon tempran. Tin biaha hende ta kere cu dialisis ta sinonimo di morto.  Ta asina cu cada dia 18 pashent mester wordo dialisa y e pashent mas hoben tin apenas 21 aña so cu problema di riñon. Cada mas o menos 2 siman tin un pashent nobo ta yega pa dialisis. Esaki ta algo hopi serio, segun sr. Choudhry.

Ta importante pa  trece informacion manera comportacion cu por trece problema cu riñon. Un factor ta e  malesanan cronico como diabetes, obesidad y presion halto, cu na momento bo tin nan bao di control por conduci na problemanan di riñon. Y nan causanan  pa evita nan tin haber regularmente  cu bo sistema di bida manera evita refresco, come saludabel y haci movecion.

Na momento cu bo wordo diagnostica cu problema di riñon e daño no por wordo repara of cura mas. E ta definitivo.  Ta pa e motibo aki cu cuido y prevencion di malesa di riñon ta asina importante y dedica un dia so na conscientisacion y informacion no ta suficiente.