Aruba elogia durante conferencia internacional OCTA; Pa acercamento pro activo encuanto problema di desperdicio

Recientemente Pais Aruba a ricibi invitacion pa participa na e conferencia ‘Association of the Overseas Countries and Territories of the European Union’ (OCTA), pa trece strategianan dilanti cu Aruba ta introduciendo pa combati e problema di polucion y desperdicio cual ta un problema mundial.

E conferencia a tuma luga riba dianan 16 y 17 di October 2019 na Brussels, na unda cu diferente Pais a bin hunto, pa para keto riba e tema menciona, intercambia ideanan, pero tambe papia riba e retonan cu tin.

Segun un comunicado di gobierno, Aruba a wordo elogia grandemente pa su strategia/ pensamento y acercamento pro activo, di tuma accion pa e problema di desperdicio. A papia di e fasenan cu tabatin pa e prohibicion di plastic cu uzo singular cu a inicia caba desde januari 2017, pero cu aworaki ta preparando pa e di dos fase wordo finalisa. A papia tambe cu nos ruman islanan, Corsou y Boneiro pa intercambia strategia pa conhuntamente traha un miho proposicion pa islanan den Caribe cu posicion den Europa por atende cu e retonan similar cu ta enfrenta. Di e forma aki e paisnan grandi Europeo por scucha y ricibi tur e informacion di locual ta e retonan di e islanan.

Algo cu a bin dilanti, cual a resalta, ta e hecho cu accionnan tuma door di paisnan grandi manera na Merca y Europa, tin efecto directo pa paisnan chikito. Esaki tabata un di e temanan principal di miembro di Parlamento Europeo Samira Rafaela, cu aworaki ta bay pone su mes disponibel pa defende interes di paisnan chikito y specialmente Caribense den Union Europeo. Asina a cera diferente laso esencial pa Aruba por haya hopi mas cubrimento y sobresali riba plataforma internacional.

Pa resumi, durante e conferencia, Aruba a comparti retonan y oportunidadnan pa cual Aruba a haya hopi elogio pa e trabou cu ta haciendo, trabou cu Ministerio tin e confiansa cu lo sigui grandemente. Importante pa agrega ta cu no obstante retonan, a confirma cu Pais Aruba ta riba bon caminda pa soluciona e problema di desperdicio y tin tur confiansa lo sigui riba bon caminda, segun e comunicado ta finalisa.