Diabierna pasa, Cosecha hunto cu dos artista local y Fundacion Ban Uni Man pa Cria Nos Muchanan a ofrece un conferencia di prensa, den cual duna di conoce nan proximo proyecto, cu ta enfoca riba un di e retonan grandi pa e comunidad cu ta ‘malnutricion di muchanan’.

Aruba lo ta e prome den region cu lo haya un muraya artistico cubriendo e tema social aki y cu hopi orguyo e partidonan envolvi kier forma parti di e comunidad internacional cu ta trahando riba e murayanan aki rond di mundo. E muraya lo bin na San Nicolas, e ciudad di Arte y Cultura di Aruba.

Merveline Geerman artista local di mosaico, a expresa cu na maart di aña aki a acerca door di e organisacion internacional ‘Organizacion di Murales por un Mundo sin Desnutricion Infantil’ y na e momentonan ey el a pidi ayudo di su coleganan, cu tambe ta artista di mosaico y di Cosecha, cu a duna apoyo pa e proyecto aki, pa motibo cu ‘esaki ta algo grandi pa Aruba’.

Segun Geerman, e proyecto aki a cuminsa na Argentina door di e organisado Dr. Abel Albino di Fundacion CONIN. E meta di e fundacion ta pa combati malnutricion di muchanan, haciendo diferente trabou riba e problematica aki. Tambe Geerman a sigura cu dos aña, pasa un periodista a lanta e organisacion ‘Murales por un Argentina sin Desnutricion Infantil’, unda muralistanan di mosaico ta wordo invita pa join e organisacion aki como boluntario, pa crea conscientisacion tocante e problema di malnutricion den muchanan y crea conscientisacion tocante Fundacion CONIN.

Aruba a haya e oportunidad di participa den e plataforma internacional aki y yuda crea conscientisacion a traves di crea un muraya. Esaki ta un manera sostenibel di haci campaña, pa motibo cu no ta uza papel y ta yuda embeyece luganan cu arte.

Enrita Werleman, otro artista local di mosaico cu lo colabora cu e proyecto aki, a duna di conoce cu na e momentonan aki rond di mundo tin 273 mural na 53 pais y cinco continente, ariba e topico aki cu ta malnutricion infantil. Aruba lo bay ta e prome pais den Caribe cu lo bin cu un of mas muraya. Asina mes el a comenta cu nan a ripara con na e isla e problema aki ta y tambe ta existi hopi malnutricion. Pa e motibo ey nan a invita un fundacion cu ta duna desayuno pa un cantidad grandi di muchanan tur dia na scolnan rond di Aruba, esta Fundacion Ban Uni Man pa Cria Nos Muchanan.

Werleman a señala cu e intencion di e proyecto ta pa por crea un mural cu un simbolo di un man, pasobra e man ta e manera con e muchanan ta pidi alimentacion y tambe ta duna alimentacion. Esey ta e nificacion di e man cu nan lo bay traha, pa e prome muraya na San Nicolas cu lo bay ta na edificio di Patrice, cu ta un tienda di coy hunga y regalo pa mucha. Esaki lo bay ta un muraya visibel cu e hende por wak kico ta encera.

El a informa cu e man lo wordo traha na diferente luga y tiendanan di Cosecha, cu e meta di por haya e cantidad di al menos 500 man.

Soraida Wever, manager di e tiendanan di Cosecha, a splica cu nan ta hunga un rol hopi grandi pa motibo cu Cosecha lo organisa dos tayer creativo unda e publico por acerca nan pa traha nan mesun man cu diferente diseño. E fecha cu e tayernan lo tuma luga ta diabierna 1 y 8 di november, cuminsando for di 5or te 7or di anochi, y den e prijs ta inclui e material, guia y refrigerio.

Di mesun manera, Wever a indica cu esunnan cu kier ta boluntario pa traha e muraya cu e man por tuma contacto cu Aruba Cosecha San Nicolas. Marinierskazerne tambe lo haya un tayer cu e artistanan local pa colabora cu e creacion di e mannan cu ta forma e watapana, cu despues lo bay ta den caya principal di San Nicolas.

John Fung, Presidente di e Fundacion Ban Uni un Man Pa Cria Nos Muchanan, a comenta cu algun tempo pasa nan a wordo acerca pa e artistanan Enrita Werleman y Merveline Geerman cu un proposicion pa e fundacion uni den e proyecto aki. E fundacion a cuminsa 18 aña pasa y durante e añanan ey nan a crece for di 138 mucha te 650 mucha, cu na e momentonan aki ta haya nan desayuno tur dia na scol.

Fung a finalisa cu tur e fondonan cu nan lo haya dor di e proyecto aki nan lo wordo poni directamente pa e muchanan.