E rating agency internacional Standard & Poors haci un analisis di e paisnan segun e efecto cu e consecuencianan di e coronavirus lo tin riba nan economia. Segun S & P, mas di 100 pais lo sinti e efectonan di e crisis aki cu segun e agencia lo surpasa cualkier epidemia den nos epoca. Segun WHO awor Europa a bira e epicentro di e pandemia, mustrando tambe un propagacion rapido riba henter mundo. E pais ariba na e lista como esun mas afecta ta Aruba.

E agencia a revisa tambe su proyeccion pa decrecimento global a causa di e pandemia, y ta kere awor cu e reduccion lo ta entre 1.6 – 2.1 punto di porciento mas abao cu nan calculacion di december 2019. E datonan inicial di China ta sugeri tambe cu e impacto di e medidanan di ‘social distancing’ lo ta hopi mas profundo di loke a anticipa anteriormente. E medidanan aki ta ser ehecuta agresivamente na un cantidad creciente di pais Europeo.

Sin embargo, e analisis di e agencia ta topa cu riesgo importante cu ta specificamente pa cierto sector. Un di nan ta e sector di biahe, cu den e ultimo decadanan a probecha mas cu tur sector di globalisacion. Actualmente, cu tanto pais cu ta cera nan frontera pa cierto tempo, a cuminsa un avalancha di cancelacion di vuelo mundialmente. Biahamento a cay drasticamente, golpeando aerolinea y companianan di biahe, ademas e paisnan cu, un mas cu otro, ta depende di turismo di exterior.

Pa varios di e paisnan analisa, turismo ta un fuente clave di entrada na divisa, pa nan crecemento di GDP y pa entrada di gobierno. Y seguidamente e paralisacion di turismo internacional lo tin efecto tambe e parametronan di e paisnan afecta pa loke ta nan rating di credito.

Pa comprende cual ta e paisnan mas afecta, Standard & Poors a elabora tres modelo di scenario cu ta calibra den linea cu un reciente evaluacion di impacto haci pa IATA, e autoridad internacional riba tereno di aviacion. Ta bisa explicitamente cu e scenarionan no ta intenciona como proyeccion, pero ta simplemente pa duna un imagen di posible resultado pa entrada for di turismo pa un determinado pais.

E tres scenarionan ta di shock ‘limita’, ‘extenso’ yy ‘extremo’ cu caida respectivo di entrada di turismo di 11%, 19% y 27%. Den cada scenario ta presupone cu e bahada ta uniforme den tur pais. E modelo ta presupone cu pa 2021 entradanan di turismo ta completamente recupera. Esaki naturalmente lo mester mira ainda.

Resultado

E resultado di e test aki ta duna como resultado cu Aruba ta encabeza e lista, sigui pa varios teritorio di Caribe, manera Belize (3), Bahamas (5), Barbados (7) y Jamaica (9) entre e prome 10 pais. Curaçao ta aparece na puesto 11. Esaki ta ilustra un biaha mas e dependencia di e region di turismo.

Nota di redaccion

Mester tene na cuenta cu den caso di dependencia extremo manera Aruba e shock por ta mas severo cu e 27% di caida di entrada for di turismo. Ademas e suposicion cu pa 2021 e paisnan a recupera completamente por resulta no realistico, ya cu no tin claridad pa ki tempo e situacion, en todo caso na e paisnan cu ta genera biahe na escala grandi, Norteamerica y Europa. Den parlamento ayera Prome Ministro Wever-Croes a menciona e cifra di caida di GDP di 44%, loke na e momento aki no por descarta.