Ayera den oranan di mainta, Gobierno di Aruba conhuntamente cu miembronan di Crisis Team a convoca un conferencia di prensa pa asina trece dilanti e situacion actual di pandemia di Covid-19. Durante esaki a informa comunidad cu a constata 17 caso di e variante Omicron na Aruba, loke ta pone den preparacion pa e ola number 5.

Segun loke prome minister Evelyn Wever-Croes a splica, e personanan contagia a test positivo pa Covid-19 dia 16 di december, na unda cu diadomingo a constata cu ta trata di e variante nobo Omicron. Wever-Croes a bisa cu e personanan aki ta turista, pero tambe tin persona local cu no tin historia di biahe.

Na e momentonan aki tin medidanan di prevencion cu a implementa algun luna pasa y nan lo keda vigente den dianan aki di celebracion di Pasco y Fin di Aña. Pa cu esaki prome minister a indica cu nan no ta mira cu mester escala e medidanan, pero nan ta keda alerta y evalua e situacion constantemente. “Si mester cualkier cambio, nos mester tuma e decisionnan pa e cambionan aki. Pero mi ta pidi pa tur hende keda pendiente pa algun cambio cu gobierno lo por anuncia”, el a indica.

Di mesun manera, nan ta wak kico ta efectonan di e variante aki, pa motibo cu na otro paisnan cu e ta activo a ripara cu tambe ta mas contagioso. Sinembargo, nan no ta convenci ainda si su efectonan ta asina mas peligroso di locual ta conoci.

Tocante e cifranan, prome minister a informa cu dia 1 di december a cuminsa cu 174 caso activo y te ayera tabata na 264 caso activo. A base di esaki nan tambe ta mira cu e cantidad di persona cu no ta residente drentando cu e virus aki ta aumentando, pa locual el a enfatisa cu nan tin un plan. “Ta e balans cu nos ta buscando entre combati e contagio di e virus aki y e recuperacion di nos economia”.

E averahe di tasa di positividad pa siman ta di 17%, loke ta nifica cu di tur e casonan cu ta test, 17% ta positivo. Esaki ta un cifra cu no ta motibo pa panico, manera Wever-Croes a sigura. E ta un cifra cu ta aumentando pero nan tine ainda domina.

Expectativanan di DVG ta indica cu e porcentahe aki lo sigui aumenta, di mesun forma cu esey ta tumando luga na otro paisnan rond di mundo, specialmente Inglatera y Sur Africa.

Variante Omicron ta mas infeccioso, loke ta nifica cu e cantidad di persona cu un persona contagia por infecta, ta mas halto.

E averahe di caso nobo pa dia ta di 29. Esaki tambe ta un motibo di preocupacion, e capacidad di hospital na e momentonan aki ta 3 persona interna na unidad di cuido intensivo (ICU) y 4 riba piso general.

Medidanan na vigor

Pa e motibo aki, gobierno y Crisis Team a declara cu nan no por flexibilisa medidanan na e momentonan aki. E medidanan ta keda lo siguiente:

Den area di Horeca, por tin maximo 8 persona na mesa den restaurant, paden y pafo, barnan y rumshop maximo 4 persona na mesa, paden y pafo. Orario di ciere ta 1or di marduga y Casino 2or di marduga. Pa comerciantenan cu a haya permiso pa haci evento (31dec-1 jan) te mainta (tot zonsopgang), 5or di mainta mester cuminsa wind-down/bouw af’ e evento.

Uso di tapaboca ta keda obligatorio den tur establecimento, incluyendo gym y scol.

Pa loke ta trata bebidanan alcoholico, ta prohibi pa consumi alcohol riba caminda publico durante henter dia; entre otro pafo di supermercado, bar, restaurant y beachnan.

Comercio ta back na 100% di nan capacidad, (cinema, tienda, supermercado, misa), entiero ta permiti 150 persona maximo (si espacio ta permiti).

Deporte por tin publico cu un maximo di 150 persona paden y 250 persona pafo.

Entretenimento musical ta permiti cu musica di background solamente y un banda musical completo por toca.

Gebiedsberbod riba area publico ta sigui vigente, riba area publico, parkinlot, beach, entre otro cu ta for 7or di atardi te cu 5or di mainta.

Bishita na cas, fiesta y encuentro social na cas of otro caminda ta permiti un maximo di 150 persona paden y 250 pafo.

Samenscholings-verbod/Aglomeracion ta di un maximo di 8 persona.

Establecimentonan nocturno, ta permiti un maximo di 150 persona, den tur establecimento nocturno por tin solamente hende sinta, no ta permiti pista di baile, solamente Satelite Dancing (canto di mesa).

Colombia no ta acepta mas pashent di Aruba cu no ta vacuna

Di su parti, minister di Salud, Dangui Oduber a splica cu un problema a presenta na unda cu siman pasa hospitalnan na Colombia a informa AZV cu nan no ta bay acepta ningun pashent mas manda di Aruba pa tratamento na Colombia cu no ta vacuna. Oduber a specifica cu esaki ta un decision di pais Colombia y no di Gobierno di Aruba.

“Esaki ta un situacion fastioso pa esnan cu ainda no a tuma nan vacuna, y si nan mester bira malo sea di Covid of di cualkier otro malesa y nan no ta vacuna, dificilmente nos lo por manda nan afo”, el a sigura.

Na e momentonan aki, nan ta deliberando cu Gobierno di Hulanda den cuadro di cooperacion cu hospitalnan den Reino pa wak si tin posibilidad pa manda e pashentnan aki cu no ta vacuna cu mester di tratamento na Corsou si ta necesario.

Pa loke ta trata campaña di vacunacion, el a informa cu ya caba 9.000 persona a haya nan booster shot y cu ayera a cuminsa e campaña dirigi na esunnan cu tin mas di 50 aña; despues lo bin pa esunnan cu tin mas di 40 aña di edad, conforme conseho cu nan a ricibi.

E siman aki Aruba lo ta ricibiendo 45.000 vacuna extra, loke ta indica cu tin suficiente vacuna pa e booster shoot y pa esunnan cu no a haya nan vacuna ainda. Oduber a señala cu nan a ripara cu den ultimo luna aki, den esnan cu a vacuna mas di seis luna pasa e efectividad di e vacuna ta bahando. Pa e motibo ey ta necesario pa haya booster shot, cu ta aumenta e efectividad di e vacuna back rond di 95%.