Aruba Dolphins Swimming a organisa ‘Awards Night’

ORANJESTAD – Durante e fin di siman, e ekipo di natación Aruba Dolphins a organisa nan ‘Awards Night’ anual. Coachnan, atletanan, mayornan y boluntario nan di Aruba Dolphins a bini hunto pa celebra un otro aña exitoso y pa reconoce e atletanan di cada age group cu a destaca den e ultimo aña, pues aña 2018.

Durante e ‘Awards Night’ di Aruba Dolphins, Head Coach di e ekipo sr. Randy Arends a conta cu Aruba Dolphins a wordo funda na aña 1975 door di Roly y Winnie Bisslik. Durante e aña nan, Roly y Winnie a haci hopi pa hiba e deporte di natacion dilanti y pa e motibo aki a gradici Roly y Winnie pa nan dedicacion y amor pa e deporte di natacion. Sr. Arends a conta tambe cu e nominacion pa ‘Swimmer of the Year’ a cuminsa oficialmente na aña 2003 unda cu e directiva hunto cu e coachnan a bin cu e idea di nombra 1 landado femenino y 1 masculino como e miho landado di e aña anterior. Durante 15 aña cu ta organisa e evento aki, varios landado cu a ricibi e premio aki ainda ta landa y ta forma parti di diferente seleccion di Aruba den exterior. Landado nan cu a ricibi e premio aki ta entre otro, Krista Farro, Erol Perez, Marellys Robles de Medina, Sylvanio Goedgedrag, Renze Postma, Mijaila Roos, Elston Yarzagaray, Saskia Postma, Ally Ponson, Tyreke Wernet, Flory Kock, George den Dunnen, Keyshawn Godet, Lucien Peterson, Elisabeth Timmer, Chloe Farro y Nathan Croes.

Swimmer of the Year
Prome cu a revela e atleta nan di cada age-group sr. Arends a splica e criteria pa a scoge e landado pa aña 2018.

Di januari pa december 2018 a pone atencion riba disciplina, presencia y puntualidad na training, respet, seriedad, progreso den su desaroyo (esaki ta ser midi di januari pa december 2018), resultadonan competitivo riba nivel nacional y internacional (esaki ta encera e medayanan cu a ser conkista y tambe recordnan Arubano cu a ser kibra). En corto: e landado ta un ‘role model’ y ta un digno representante di e ekipo Aruba Dolphins y Aruba. E landadonan cu e aña aki a logra cumpli debidamente cu esaki ta:

Despues di analisis profundo, e coachnan a scoge Chloe Farro y Ronald Fun como ‘Swimmer of the Year 2018’. Directiva y Coachnan a felicita tur e atleta nan pa nan esfuerso durante 2018. Club kier a gradici Tribike como sponsor pa e premio nan pa e “Swimmer of the year” y tambe PrintMaster cu a sponsor nos banner nan durante di e fiesta di gala. Tambe directiva kier a gradici e damanan  cu a organisa nos tremendo Masquerade Ball  cu adorno nan super bunita. Na final anuncia e siguiente competencia pa e aña aki, e Stingray Challenge 2019, cu lo tuma luga e prome fin di siman di april 2019.

Pa mas informacion tocante Aruba Dolphins Swimming por subi riba e Facebook ‘Aruba Dolphins Swimming’ of pa informacion tocante inscripcion, por tuma contacto cu sr. Randy Arends na randyarends@hotmail.com