Den fin di siman, 11 y 12 di maart, a tuma luga edicion number 10 di Aruba Doet, e iniciativa mas grandi di trabao boluntario na Aruba. E meta di Aruba Doet ta pa stimula henter comunidad pa duna sosten na diferente organisacionnan social. A pesar di e gran cantidad di trabaonan boluntario cu ta wordo eherce na Aruba, tin organisacionnan cu toch ta keda falta ayudo boluntario, y esey ta obhetivo final di e gran evento aki.

Durante e fin di siman di trabao boluntario, diferente luganan hunto cu nan trahadonan a uni forsa pa asina yuda e organisacionnan social aki cu diferente trabao, por ehempel haci limpiesa, verf, atende cu bestia, trabao di mantencion y hopi mas. Diferente fundacion, scol, institucion di cuido, centro di bario, grupo di scouting y club di deporte a inscribi y participa pa ricibi e ayudo di boluntarionan.

Na 2021 Aruba Doet a registra 155 organisacion social cu a ricibi ayudo di mas di 2300 boluntario y asina a logra completa 166 proyecto. E aña aki un biaha mas por a mira un cantidad grandi di boluntario yudando varios di e organisacionnan aki.

Stichting Monumentefonds Aruba a participa un biaha mas cu Aruba Doet y e aña aki e stichting a duna un man na Aruba Animal Shelter. Dos boluntario cu a participa cu e stichting, Milagros Chacon y Jessy Alvarado, a conta Bon Dia Aruba di nan experiencia participando cu Aruba Doet.

Alvarado ta conta cu esaki ta su prome aña participando cu Aruba Doet y el a haya e experiencia hopi bunita pasobra nan a yuda Aruba Animal Shelter y e ta un persona cu stima bestia caba.

“Mi ta haya e ta un bunita labor social. Mas hende mester participa y yuda y no warda te ora un compania, e empresanan of nan doño di trabao bisa nan pa bay y participa, si no mas bien cada ken bay di nan mesun parti. E luga ta habri y na por yega cualkier dia den siman y colabora cu cualkier cos, nan por baña e cachonan, chapi pafo, nan por trece un incentivo monetario, nan por trece cuminda, habon pa laba e serbetenan. E hendenan por colabora cu cualkier cos y di berdad ami a gusta hopi y mi lo bolbe hacie”, Alvarado a indica.

Chacon di su banda a conta cu e tambe a disfruta masha hopi mes di e experiencia y esaki no ta su prome biaha participando cu Stichting Monumentenfonds Aruba den Aruba Doet. Aña pasa Chacon hunto cu e stichting a participa y a yuda na Donkey Sanctuary di Aruba.

“Mi ta gradicido na bida y na Aruba pa duna mi e oportunidad di participa den un evento cu den mi opinion meter wordo organisa mas cu un biaha pa aña. E ta un oportunidad pa nos tur colabora un bon causa. Por ehempel aña pasa tambe nos a bay Donkey Sanctuary y e experiencia tabata hopi bunita. E biaha ki nos a bay Aruba Animal Shelter y e tabata un experiencia maraviyoso, y esey tambe ta kibra e curason di hasta e persona cu curason mas fuerte”, el a expresa.

El sigui conta cu tabata hopi bunita cu nan a haya e oportunidad pa comparti cu tur e bestianan y cu tur e boluntarionan a traha cu hopi amor tambe. “Ami lo bisa tur hende pa no cumpra ningun tipo di bestia, pa nan bay e luga y adopta pasobra semper tin bestia eynan wardando pa wordo adopta y ta warda e amor y atencion di un persona”, el a agrega.

Sra. Chacon a enfatisa tambe ariba e parti di conscientisacion di henter comunidad pa contribui y participa den un evento manera Aruba Doet. “Esaki no mester ta obligatorio, pero si mester conscientisa tur hende pa participa. Y e mester ta tambe un participacion familiar, caminda famianan tambe ta uni pa participa y contribui na un bunita causa”, el a finalisa.