ORANJESTAD – Aruba Doet hunto cu Unity Carnaval Group ta e grupo cu lo ta bayendo, pa mas di 11 aña, na e dos parada grandi pa persona cu limitacion. E aña aki lo ta e di dos aña cu Aruba Doet lo participa.

Thixianne Wever y Stephany Phelipa, ambos coordinador di proyecto di Aruba Doet, ta haya cu e ta bon iniciativa, anto ta pidi pa si cualkier persona cu limitacion lo kier participa den parada, pa pasa ‘un bon rato’. Nan ta socio hunto cu diferente fundacion pa por realisa esaki.

Wever ta agrega cu e costo ta uno abou pa asina duna oportunidad pa nan por participa. “Den e parti di limitacion, nos di Aruba Doet y CEDE ta apoya esey. E enfoke pa promove inclusion, sea den proyecto di problema social, pa hoben, persona di 60+, deporte, programa di despues di scol.”

Pa locual ta trata persona cu limitacion, Wever ta bisa cu nan ta traha cu Aruba Doet pa yuda den cualkier cos. Si ta pa un evento, of paketa cierto saco pa parti, manera bartendernan, meseronan. Traha cosnan pa evento mes di Aruba Doet. “Nos ta traha cu Sonrisa, Trampolin Pa Trabou, esey ta yuda nos promove inclusion”, Wever ta splica.

Sinembargo, Wever ta remarca cu ora persona cu limitacion ta activo, nan ta pasa bon. Pa nan por traha cu cliente y ta boluntario pa yuda nan, ‘e ta bunita pa wak’. Nan ta bisa cu e costo di parada ta uno cu ta ricibi hopi colaboracion di varios instancia y departamento cu ta mustra nan interes y e sosten.

Pa motibo di esey, nan ta cubri ‘basicamente tur cos cu nan sosten’. Y nan kier pa persona cu conoce cualkier persona cu tin algun limitacion cu no kier sali for di cas of no sa e informacion, pa acerca pa busca informacion y asina por asisti na e parada. “Aña pasa tabata un exito.”

E aña aki, Aruba Doet tambe a lansa nan mascota cu lo ta participante den carnaval. “Nos mascota yama Doeti, cual e ta un colibri/ blenchi. Djis e color ta oraño cu blauw, cu ta color di Aruba Doet. Nos a kies un blenchi pa motibo cu e ta un parha cu ta lihe aki aya, y ta traha duro, cual ta un match pa nos como boluntario”, Wever ta splica.

Aruba Doet su di 7 edicion ta un forma cu por gara mas atencion pa e aña ki den nan actividad di boluntario. “Nos evento anual, nos tin nos boluntario cu ta comunica cu nan miembro, asina nan ta keda duna charla, pa bay e scolnan, compania pa yega na mas boluntario.”

Wever ta splica cu no tur ora e persona por ta boluntario den traha, pero por aporta den cualkier sentido, por ehempel, ‘sosten di nan experiencia y conocemento’. Nan ta keda gradici di interes y apoyo cu nan ta ricibi.

Bon Dia Aruba a puntra si nan lo bin cu mas actividad. Wever ta contesta cu hende tin biaha ta pidi, peroy cu evento anual di trabou ta tuma su tempo pa planea y tur cos sali manera mester ta.E preparacion ta pisa, Wever ta remarca. “Tur cos mester ta na su luga. Por yuda duna un man na un scol chikito. E ta bay na e parti cu Aruba Doet por yuda den e forma pa otro fundacion cu tin actividad constante por haya boluntario tambe. Cu e actividad bo ta siña conoce organisacion y fundacion cu ta creciendo. Nos ta yuda den e parti di promove.”

Algo cu Wever a agrega ta cu tin variedad di cosnan cu e boluntario por opta pa haci. “Tin e parti creativo, zumba, hersengymnastiek, pintamento, bayendo actividad social cu diferente instancia, lama, wega y pa esunnan cu kier haci trabou, ta kies esey manera verf, afdak, chapi, entre otro.”

Persona cu kier ta boluntario por bay na e website pa inscribi. Nan por scoge e trabou specifico cu nan kier haci, si no ta compronde, e persona por ser atendi cu Aruba Doet pa nan por guia den kico e boluntario kier haci.