CEDE Aruba, den cooperacion cu Oranje Fonds, lo ta organisando Aruba Doet pa di 13 aña consecutivamente. Esaki ta un otro oportunidad pa organisacionnan social eherce un trabao pa of organisa actividadnan social pa nan grupo specifico cu ayudo di boluntarionan.

Riba diabierna 15 y diasabra 16 di maart 2024, CEDE Aruba en cooperacion cu Oranje Fonds ta organisa Aruba Doet, e accion boluntario mas grandi na Aruba.

ARUBA DOET a cuminsa na aña 2013 bao iniciativa di Oranje Fonds. Bao nombernan di NL Doet, Aruba Doet, Bon Doet, Cura Doet, Statia Doet, Saba Doet y SMX Doet, e seis iniciativanan aki ta pone trabao boluntario den spotlight y stimula tur hende pa pone man na obra pa un of parti di dia. Asina Oranje Fonds hunto cu miles di organisacionnan social y partnernan manera CEDE Aruba ta organisa e accion boluntario mas grandi den Reino.

Boluntarionan ta e motor tras di hopi organisacionnan social. Cu Aruba Doet, CEDE Aruba y Oranje Fonds ta demostra con importante ciudadanonan activo ta pa comunidad. Banda di esey ARUBA DOET ta aporta na e bon imagen di trabao boluntario y ta ilustra con dushi esaki por ta.

Na 2021 nan a haya 2.600 boluntario y 191 proyecto, na 2022 mas di 3.200 boluntario a duna un man na 189 proyecto na Aruba y na 2023 nan a haya casi 4.000 boluntario y 194 proyecto. Naturalmente na 2024 nan kier pa mas hende ta activo durante e dianan di Aruba Doet.

Oranje Fonds ta e fondo mas grandi riba tereno social y ta demostra e miho parti di Reino. Pa aña Oranje Fonds ta inverti mas o menos €30 miyon den organisacion y iniciativanan cu ta reforsa e lasonan social na Hulanda y e parti Caribense di Reino. Rey Willem-Alexander y Reina Maxima ta e pareha protector di e fondo aki. Bishita www.oranjefonds.nl pa mas informacion.

CEDE Aruba ta un organisacion cu ta duna sosten na desaroyo y co-financiamento di programa y proyectonan den sector social. E programa y proyectonan aki ta wordo introduci y realisa pa non-governmental organizations (ngo’s). Na Aruba tin hopi NGO’s cu ta haci nan esfuerso pa mehora e facilidadnan social pa comunidad. CEDE Aruba ta yuda NGO’s cu desaroyo y financiamento di tur sorto di proyecto duradero. Bishita www.cedearuba.org pa mas informacion.

Potretnan ta di Aruba Doet su pagina di Facebook.