Ayera nochi tabata tin un anochi informativo como tambe tayernan cu tambe ta den man di organisacionnan nobo cu lo participa den e siguiente edicion di Aruba Doet.
“Nos ta contento cu tin un par di cara nobo akinan cu lo bay hisa e cantidad di proyectonan atrobe pa 2017,” director di CEDE Aruba Daniel Tecklenborg ta bisa Bon Dia Aruba. Ayera nochi nan a splica e procedura con pa participa den Aruba Doet.
Esaki ta encera entre otro registracion online, con bo ta recluta y con pa trata cu e boluntarionan anto ki tipo di proyecto bo por aplica pe.
E deadline pa aplica pa un proyecto ta riba 23 di januari anto bo mester registra riba e pagina di web www.arubadoet.com. Aruba Doet 2017 lo ta riba 10 cu 11 di maart pero ayera nochi a inicia e preparacionnan cu un charla y tayer di con pa organisa un trabao di construccion y con pa organisa un actividad social pa e clientenan di e organisacion. Esaki ta pues un tipo di ‘kick start’ pa inicia e preparacionnan pa otro aña di cual sr. Tecklenborg ta bisa: “Pa e di cinco edicion claro cu nos ta bay bin cu mas proyecto, nos a cambia e colornan di e proyecto un tiki anto nos ta bay tin un sorpresa special cual mi lo anuncia mas despues.”
Accion boluntario mas grandi di reino
Entre 2013 cu 2016, Aruba Doet a completa 500 trabao cu ayudo di 11.000 boluntario. E aña aki 135 organisacion social a participa, 153 diferente proyecto a keda completa cu ayudo di mas cu 3.250 boluntario. Clifford Rosa presidente di Fundacion Rancho tambe tabata presente ayera nochi anto ta bisa Bon Dia Aruba cu: “Nos tin cuater aña consecutivo participando den Aruba Doet anto esaki ta bay bira e di cinco aña. Sigur pa nos ta un bon momento pa tende con cos ta hinca den otro pa asina ey nos por aplica un miho peticion pa cu e proyectonan cu nos ta haciendo.”
Filomena College Mavo tambe tabata presente bisando Bon Dia Aruba cu pa nan esaki lo ta prome biaha cu nan ta bay participa y nan tin cierto cosnan cu nan kier haci na e scol cual nan ta spera di por haci cu e evento na maart otro aña.
