Den un carta fecha 19 di mei 2020 secretario di estado Raymond Knops a informa Tweede Kamer encuanto e avancenan di e labor cu e islanan den e situacion di emergencia causa pa coronavirus Covid-19.

Den su carta Knops ta pone un biaha mas e condicionnan exigi pa e apyudo financiero na e islanan. Tambe Knops ta elabora riba e tema di solidaridad den reino, unda e ta argumenta cu loke a heci te awor ta muestra di solidaridad cu mester tin den Reino. Sin embargo, e secretario di estado ta defini mas aleu cu ken e solidaridad ta: “ Na mes momento nos mester mantene na vista riba ken e solidaridad ey ta orienta. Den e paisnan ey (e islanan; red.) e abismo entre esnan cu ta baña den luho y esnan cu no por, o di baina, tene nan cabez riba awa, ta grandi. Y e abismo ey ta creciendo a causa di e crisis aki. Ta pesey cu e ayudo Hulandes mester yega na e habitante y empresanan cu tin mas mester di esaki. Ta pesey e focus di e ayudo brinda ta riba ayudo medico y humanitario.”

E solidaridad anto, segun Knops, a keda para fuerte. Sin embargo, e ta haya cu solidaridad mester ta na ambos banda. “E ta exigi di e paisnan Caribense pa nan pasa e reformanan ncesario rapidamente pa reforza e capacidad di resistencia. Medida pa fortifica e structura socio-economico, pa percura cu placa di impuesto Hulandes ta conduci na mehoracion concreto y responsabilisable. Sin e tipo di medida aki cu lo fortifica e resistencia di e comunidadnan aki a mas largo plazo, pa ningun hende tin sentido di pone disponible sumanan grandi na apoyo finnaciero for di Hulanda. Manera mi a anuncia caba e suministro di mas ayudo di liquidez for di Hulanda lo depende di e disposicion di e paisnan pa implementa e reformanan ey.”

Knops a duna un relato di loke a keda concretisa den e reunion di Conseho di Ministro di Reino di dia 15 di mei. Di esey e ta raporta na parlamento cu tabatin un proposicion concreto riba mesa, pa e periodo di 15 di mei te cu 30 di juni. Ta trata di prestamo cu condicion suave, pero cu cierto condicion mara na nan. Tambe e ta bisa cu no a yega na ‘rond af’ e toma di decision den e asunto aki y cu e paisnan tabatin te diarason 17:00 ora di Hulanda pa bisa formalmente cu nan ta bay di acuerdo. Knops a menciona den e carta tambe cu di banda di Aruba ya caba a ricibi un aceptacion di e condicionnan. Pa e paisnan, eventualmente Curaçao y Sint Maarten, cu no reacciona na tempo, e oferta ta caduca, segun Knops.

E condicionnan ta encera, e.o. e aceptacion di reduccion di gasto di AZV di Afl. 5 miyon pa luna; 25% di reduccion di salario y otro beneficio di parlamentario y ministro; recorte di 12,5% di salario di tur empleado den sector (semi-)publico; y medida similar pa loke ta salario di empleado di empresa y otro entidad liga na gobierno; ademas e introduccion di e norma di 130% maximo pa salario di director y otro funcionario halto di e entidadnan aki. E medidanan ta conta tambe pa esnan cu ta arbeidscontractant y pa e ‘consultantnan’. Y, tur esey pa tempo indefini y sin posibilidad di ‘indexering’. Knops ta menciona den su carta tambe cu e reduccion di salario den e sector (semi-)publico ta necesario como solidaridad cu e empleadonan den sector priva, unda ta pidi di nan un entrega di 20% di nan salario den e companianan cu ta haci uso di e areglo di subsidio di salario.

Nota di redaccion:

E carta di e secretario di estado ta un confirmacion mas di e cartanan (di wega) cu (taba)tin riba mesa y ta na cada un di e islanan pa haci loke nan ta considera mihor cu “e man cu Hulanda a deal nan”. Gobierno di Aruba a acepta esaki caba, loke ta laga poco espacio pa bay discuti cu e sindicatonan y otro stakeholder cu ta haya cu mester scucha nan ainda. Por papia pero esaki no ta cambia nada na e situacion real unda no por haci nada sin e ayudo Hulandes.