Aruba den teritorio di peligro grandi pa Covid-19: Equipo Mericano a yega Aruba

Cu casi 900 caso di Covid-19 activo, ta logico cu mester tene cuenta cu e servicionan di emergencia pa combati e brote grandi actual mester ta na nivel pa por maneha esaki. E promer señalnan cu tin algo ta sucede ta e confirmacion di e yegada di un equipo di personal medico specialisa for di Merca di, segun nos informacion 10 persona, cu lo ta e backup pa e equipo local.

E equipo aki ta pertenece na e mesun acuerdo cu tabatin cu Hulanda, cu ta paga e gastonan pero ta opta pa no usa personal medico Hulandes. E yegada di e equipo cu EZ-Air for di Corsou lo ta señal cu por ta trata di e mesun team cu lo a bin Aruba na april.

Mientras tanto, e cifranan di caso positivo a yega na un nivel realmente preocupante. Cu 1.102 caso total y 898 caso activo awor, Aruba ta number nuebe riba lista di pais den region di Caribe, y ta ademas e pais chikito cu mas caso. Tambe si contempla e asunto for di e corelacion cu tamaño di poblacion, Aruba tin un score preocupante di 0.77% di caso activo compara cu poblacion. Midi pa cantidad di caso pa cada 10.000 habitante Aruba ta na top di lista cu un score di 95 (caso pa 10.000 habitante). Den e lista di promer 10 pais cu mas caso den Caribe, Bahamas, sigui pa Aruba y US Virgin Islands, ta e unico teritorionan chikito, entre paisnan grandi manera Republica Dominicana, Puerto Rico, Haiti, Cuba, cu Jamaica, cu tur tin poblacion di mas di un miyon.  Tin actualmente 11 persona interna actualmente na hospital, di cual dos ta den ICU y e resto ta den isolacion. Te awor esaki ta manehable, pero esey por cambia rapidamente den e proximo dianan  y bira un situacion critico.

Organisacion no ta pa carga (casi) mil caso

Un impresion di con e situacion di atencion na hende cu a contagia cu e virus ta na e momento aki, ta bin di un caso cu a denuncia cerca redaccion di Bon Dia Aruba. Un persona conoci pa redaccion a constata cu e por tin sintoma di Covid y tabata teme cu resto di famia tambe lo por ta contagia. Bishita na docter di cas no a resulta, ya cu nan no a ni logra haya docter pa wak, pasobra e assistent a evalua e caso y a conclui cu nan no tin nada. No contento cu e contesta aki nan a logra haya haci test cerca un laboratorio cu a resulta positivo pa tres persona. A tuma e medida di inmediato pa pone nan den un cas nan so pa no core riesgo cu por plama e enfermedad mas ainda. E caso a ser pasa pa e autoridadnan concerni (DVG) pero te na e momento aki, despues di varios dia, no tabatin ningun contacto di banda di e instancia aki.

Esaki no ta intenciona como critica, pero cu e magnitud di e crisis yegando posiblemente na mil caso activo den e proximo dianan, ta di anticipa cu e organisacion na Aruba no ta diseña pa carga e volumen aki. Ta di spera cu e cantidad di caso cu ta requeri internacion den hospital keda limita, sino nos tur ta den problema grandi. Pesey tambe ta importante pa tur hende tuma maximo precaucion den e dianan aki, y sigui tur instruccion di autoridadnan.