Dia 18 di maart ta acercando y esaki ta trece cune diferente actividad rond di henter Aruba en conexion cu e celebracion di Dia di Himno y Bandera.
Celebracionnan a cuminsa for di weekend ultimo durante cual tabatin e festival Un Canto pa nos Himno y Bandera. Pueblo di Aruba a acudi masalmente na e tres dianan di e festival na unda tabatin no solamente musica tipico, pero tambe cuminda, cos dushi, artesania y hopi mas.
Durante siman celebracionnan ta sigui y na diferente scol rond di Aruba tin actividad principalmente riba diahuebs, ya cu diabierna no tin scol. Diabierna anochi, manera ta tradicion, tin e manifestacion riba Plaza Betico Croes na unda pueblo por disfruta atrobe di presentacionnan di canto, baile, poesia y e feria di cuminda crioyo, artesania. Arte y mas.
Diasabra mainta, riba e dia nacional 18 di maart, manera tur aña, tin e acto protocolar riba Plaza Betico Croes durante cual tin discurso di entre otro su excelencia Gobernador di Aruba y Prome Minister. Tin tambe e desfile di diferente grupo- y organisacionnan uniforma y presentacion di coro di mucha.
Riba 18 di maart pueblo di Aruba ta sali disfruta di tur e evento- y actividadnan cu tin rond di e isla. Centronan di bario, museonan, fundacionnan, ekiponan di sport, organisacionnan y mas ta organisa nan evento y ta haci actividad pa grandi y chikito.
