Un bashamento di bala 11 biaha riba un auto dilanti misa di Noord, un asesinato di 1 tiro den cabes den area turistico, un drive-by shooting cu a costa bida di un dama canando riba caya, intento di likidacion riba brommer den mondi fierno, esakinan ta algun caso cu a ser cometi entre hoben y menor di edad na Aruba.

Kico ta sensacion di siguridad? (veiligheidsgevoelens)
Sentimento di siguridad tambe ta referi como siguridad subhetivo. Esaki ta contrario di siguridad obhetivo. Cu esaki nos ta referi na e nivel realmente di criminalidad y molester; e siguridad subhetivo ta indica con hende ta percibi y experencia esaki. Top of Form

Cifranan riba criminalidad no ta bisa tur cos, cifranan di criminalidad ta duna un bista limita riba e sensacion di (in)siguridad di hende.

Siguridad Obhetivo ta loke ta ser midi, loke a pasa na unda crimen di arma di candela na Aruba na 2022 tabatin un total di 131 ofensa di arma, compara cu 84 na aña 2021, estadisticanan di polis ta mustra un aumento den concurencia di posesion di arma entre hendenan hoben, e nivel realmente di criminalidad di arma di candela a aumenta esaki.

Sentimento di siguridad den nos hendenan local na Aruba ta subhetivo, debi cu tin indicacionnan cu ciudadanonan no ta sinti nan mes sigur mas mirando cu ta mas cu logico cu crimen di arma di candela ta aumentando, prensa ta haciendo su trabou di reporta esaki pero Gobierno di Aruba no ta haci ningun investigacion oficial pa asina haya sa con e pueblo di Aruba ta sinti pa loke ta trata siguridad.

Mirando e tiramentonan aki, e situacion a cuminsa yega hopi cerca di nos pilar economico cu ta den e area turistico di High Rise cu sigur lo tin su efecto si algo mester pasa cu un turista si e ta ser herida of asesina, e sensacion di siguridad di e turistanan cu ta bin Aruba lo ser midi despues cu e desgracia lo pasa. Cu desaparicion di Natalee Holloway na 2005 a surgi un atencion di media na Aruba, e atencion aki tabata tin consecuencianan significante pa e economia di Aruba lo cual a traduci na un efecto negativo riba economia di Aruba, entre 0,5 y 2,1 porciento di e GDP di Aruba nominal pa e aña 2005 y entre 2,5 y 4,0 porciento di e GDP pa e aña 2006.

Preocupacion grandi riba loke ta trata posesion y uso di arma candela
Na Aruba, tin un preocupacion grandi riba loke ta trata posesion y uso di arma candela. Regularmente, ora di atraco ta usa arma candela. Cada aña tin victimanan fatal door di uso di arma candela. Cada aña Ministerio Publico ta persigui mas o menos 100 sospechoso pa tin arma candela den nan posesion. Na Aruba ta relativamente facil pa haya un arma di candela. Den diferente yegada di lancha for di Venezuela, nan a confisca nan y Venezuela ta 50 kilometer leu di Aruba, cu un boto rapido por cubri e distancia den 1 ora mas o menos, tur cos ta depende e tempo.

Ordenansa nacional di arma di candela y municion
 Regulacion di arma candela ta mara den Ordenansa Nacional di Arma di Candela cu Municion specificamente den “Articulo 3 inciso 1 cu ta indica lo siguiente: Ta prohibi tin un arma candela of municion den posesion, excepto pa e excepcionnan menciona den paraaf 2.

Violacion di un prohibicion estableci den articulo 3 di prome paraaf di Ordenansa Nacional Di Arma di Candela cu Municion, ta ser trata como un crimen y ta ser castiga segun lo menciona den articulo 11 di e mesun ley aki.

Articulo 11 ta bisa cu esnan cu ta viola un prohibicion estableci den e Ordenansa Nacional di Arma di Candela y Municion, ta ser castiga cu un sentencia di prizon di maximo di cuater aña of un multa di maximo te cu dies mil florin, na mas tanto cu seis aña of un multa di mas cu binticinco mil florin. E delitonan estableci pa medio di e ley aki, si nan ta considera cu nan por resulta den sentencia di prizon, ta considera como crimennan y den otro caso como ofensanan.

Ministerio publico su rapport anual 2022
 Segun e jaarverslag di OM, na 2022 tabatin un total di 131 ofensa di arma, compara cu 84 na 2021. Sinembargo, na 2021 tabatin un caso di importacion ilegal di arma sin permiso, mientras cu na 2022 no tabatin ningun. Tabatin un aumento den e cantidad di incidente cu arma di candela na 2022. Ministerio Publico (OM) y polis a anuncia nan maneho intensifica pa cu posesion di arma di candela durante un conferencia di prensa dia 29 di juli 2022, manera Procurador General (PG) y hefe di polis a declara.

Estadisticanan di polis ta mustra un aumento den concurencia di posesion di arma entre hendenan hoben. Cuerpo Policial (KPA) a realisa varios investigacion riba incidentenan reporta di tiramento. Adicionalmente tabatin incidentenan cu no a keda reporta pero si a keda treci dilanti di manera informal cerca polis.

Detencion di hoben cu tabata posee arma di candela
 Ayera atardi, redactor di Bon Dia Aruba a haya un comunicado di prensa di Cuerpo Policial unda a informa cu recientemente a sosode un caso ora un patruya policial a para un auto pa control na altura di Lerlandstraat. Na dado momento un mucha homber a sali for di e auto y core bay for di e sitio. Despues a haya arma di candela scondi den un cura di un cas den cercania.

Atraco Team a haci nan investigacion y a detene e mucha homber cu a core bay for di sitio di inicial J.R. di 16 aña di edad.

Cu e detencion aki tambe tabata tin dos persona mas envolvi. Den total tres persona ta deteni den e caso di posesion di arma di candela.