Ayera den cuadro di e clausura di e di dos version di Heath Care Conference Aruba (HCCA) e tres paisnan Aruba, Corsou y St. Maarten a mustra nan intencion pa traha mas estrecha riba salud. Nan a firma un Letter of Intent.

Esaki minister di Salud Publico, Alex Schwengle a anuncia den colaboracion cu su coleganan di Corsou,  Carmelita Romer y di St. Maarten, Emil Lee.

E Letter of Intent a nace for di un Memorandum of Understanding (MoU) firma na 2015 caba. E paisnan den Reino incluyendo Hulanda a firma esaki. Sinembargo despues a keda keto. Minister Schwengle a bisa ayera cu e ta lamenta cu e MoU aki a keda pega na Corsou, a pesar cu Aruba y St. Maarten a firma. E motibo di e tardansa di e firma di e MoU segun e mandatario tabata debi na cierto instabilidad politico na Corsou.

El a lamenta esaki ya cu e MoU aki tabata uno “facil”, caminda e tabata contempla cu cada aña e ministernan di Salud Publico di Reino Hulandes lo sinta hunto, ya cu e maneho politico di salud publico ta concerni na cada partner den reino.  “Pero boluntariamente nos kier sinta hunto y delibera riba e topiconan mas importante pa wak con nos por yuda otro pa hiba nos salubridad dilanti”, e ta declara na Bon Dia Aruba.

Nan a probecha di e conferencia di HCCA pa tuma over e asunto aki hunto cu su dos colega di Corsou y St.Maarten. E mandatario di Salud Publico di Hulanda no tabata presente ya cu e ta demisionario, teniendo na cuenta e situacion politico cu madre patria ta pasando aden despues di eleccion reciente. “Si nan bini mes cualkier palabracion cu bo haci no ta bay tin balor”, segun minister Schwengle.

Acuerdo
Den e acuerdo ta stipula cu e islanan lo sinta hunto como partnernan pa dialoga riba retonan y aspectonan den cuido y pa mira con por yuda otro a base di colaboracion cu ta promove un “win-win” pa e islanan. Asina e ministerio ta informa den nan relato. E base di e acuerdo ta pa traha hunto den un esfuerso pa reduci gasto y pa subi e balor di e servicio cu ta brinda. Den e letter of intent ta specifica algun area di e logronan cu kier concretisa den e siguiente dos añanan y concretisa e puntonan aki pa firma un acuerdo total dia 21 di juli proximo na Corsou.

Colaboracion inspeccion cu St. Maarten
Banda di esaki tabatin e firma di acuerdo entre nos isla y St. Maarten riba tereno di inspeccion, ya cu e ta un asunto cu  pa basta tempo nan ta trahando riba dje. Esaki ta pa motibo cu for di januari ultimo e departamento di inspeccion di salud di Aruba a lanta. Minister Schwengle ta kere cu a yega tempo pa firma e acuerdo aki na nivel di ambos gobierno.

Earl Best, Inspector General di St. Maarten y Dorylee Lopez Penha, Inspector General di Aruba a acorda cu e dos inspeccionnan lo traha hunto riba tereno di intercambio di personal, profesionalnan medico y protocolnan.

“Locual esaki kiermen ta cu por ehempel si tin un investigacion andando na Aruba y cu Inspeccion di Aruba ta sinti cu e caso ta hopi complica of ta desea pa por conta cu extra experticio, cu e Inspector di Sint Maarten por bula bin Aruba pa hacie”, asina sr. Best ta splica.

Sra. Lopez Penha a duna di conoce cu e Inspeccion di Salud Publico di St. Maarten a inicia den forma independiente despues cu e isla a para riba su mes, esta na 10-10-10. “Bisando esey, nan tin 7 aña mas di experencia cu nos y como tal nan por duna nos un bon man awor cu nos a cuminsa aki na Aruba. E intencion ta pa nos yega na e mesun acuerdo asina cu Corsou y cu e islanan BES tambe. Esey ta e idea y mi ta convenci cu nos lo yega eynan pronto.”