Dialuna atardi Prome Minister di Aruba, Sra. Evelyn Wever-Croes, hunto cu e Prome Minister di Sint Maarten, Sra. Silveria Jacobs, y tambe Prome Minister di Corsou, Sr. Gilmar Pisas, a tene un conferencia di prensa despues di a tene reunion Tripartite. Durante e conferencia tur tres Prome Minister a duna nan prome declaracionnan despues di e reunion y tambe a elabora ariba algun tema cu a keda discuti durante e reunion.

Prome Minister di Aruba, Sra. Evelyn Wever-Croes

Minister Wever-Croes, a indica cu e minister a atende puntonan di similaridad pero tambe puntonan di diferencia entre e paisnan. Aruba a wordo afecta severamente pa e pandemia y aworaki tur energia y atencion ta den e direccion di recuperacion, y loke ta trata e recuperacion di turismo ta bayendo miho na Aruba. Segun Minister Wever-Croes a informa, si tur cos bay bon, Aruba por cera e aña cu un recuperacion di entre 70% cu 73%, y tambe ta mira un crecemento economico e aña aki di 13.6%

Aunke e number ta subiendo, Minister Wever-Croes ta enfatisa cu e no ta 100%, ainda no a yega caminda cu mester yega pa gobierno por carga tur e gastonan cu e entrada Aruba ta haya. Algun di e temanan cu e minister a delibera durante reunion ta e temanan di cooperacion, e temanan cu ta uni e islanan. “Nos a papia por ehempel ariba e sosten di likides, e palabracionnan cu Hulanda, nos a papia di COHO, nos a papia di e ley di raft, nos a papia di diferente aspecto cu nos tin encomun pero mas importante ta pa mira con nos por traha hunto pa yuda trece mas progreso y bienestar pa tur tres pueblo”, el a indica.

Prome Minister di Aruba a gradici cu coleganan minister pa nan presencia, pa nan input cu a wordo duna den e reunion. Un reunion cu el a categorisa como uno sumamente valioso caminda cu no solamente nan por a estrecha lasonan di amistad y hermandad un biaha mas ,pero mas bien tambe traha hunto y haci palabracionnan pa por sigui bay pa dilanti.

Nos ta mira back ariba un dia hopi intenso di reunion hopi fructifero, palabracionnan concreto cu ta bay yuda nos den e pasonan nos dilanti y cu enegia renoba pa nos enfrenta e periodo nos dilanti”, e la agrega.

Prome Minister di Corsou,Sr. Gilmar Pisas

Minister Pisas tambe a enfatisa e importancia cu e reunion cu a tuma luga tin pa Corsou recordando tambe cu na 2018 tanto como 2019 tabata e delaster añanan cu tabatin e reunion triepartiet y e pandemia di COVID-19 tambe a stroba e proceso, pero ariba recomendacion di Prome Minister di Aruba e islanan a logra reuni atrobe.

Nos tin di bisa cu e binimento hunto a aporta enormemente na informacion cu nos tabata intercambia sigur via whatsapp y tambe otro maneranan virtual, pero awe papiando personal sigur nos ta mas informacion di otro y con nos tin cu sigui traha. Manera Prome Minister di Aruba a bisa caba nos tabatin hopi topiconan hopi interesante”, el a bisa.

El menciona tambe e tema di e fondo di likdes, cu a wordo discuti durante e reunion, sifgurando cu tanto Corsou, Aruba y tambe Sint Maarten tin e mesun pensamento cu ta yega un caminda cu e fondo di likides lo tin cu stop mirando con mundo ta deal cu e pandemia y e tres paisnan aki tampoco no ta un excepcion.

Minister Pisas a splica cu nan a trece dilanti loke ta trata e aspecto horeca na Corsou,cu e ta indica, tin basta problema pa haya trahadonan y ta un di e motibonan sigur cu e ta bisa ta motiva nan pa crece back e economia local na Corsou.

Mi a bira hasta un tiki hopi jaloers mirando con Aruba ta recuperando pa loke ta trata su turismo. nan mes a tende tin un crecemento economico sigur pa loke ta trata Aruba, na Corsow te ainda nos no a yega eynan pero esaki sigur a motiva mi pa mi bay Corsou back y traha hopi mas duro pa nos tambe por yega na e parti caminda nos por cuminsa bisa cu nos economia ta creciendo”, e la expresa.

El a indica tambe cu Corsou tabatin problema prome cu e pandemia a cuminsa caba pasobra Corsou su economia tabata depende basta di nan refineria y tambe e situacion cu Venezuela tabatin un impacto. Ariba nan economia. El a sigui splica cu awor aki Corsou tambe ta den e rumbo di recuperacion turismo, “sigur copiando for di Aruba con e ta hacie paso esey ta e great di e comunicacion cu nos tin entre nos y esey ta trece cune cu nos como pais tin cu sigui traha hopi mas duro”.

Den un cuadro amplio mi ta sintimi satisfecho, orguyoso di nos tur tres cu na nomber di nos pais nos a intercambia informacion y asina ey sigur nos por trece mas claridad entre nos y sigur calidad tambe pa e pueblonan di tanto Aruba, St Maarten y Corsou”, Minister Pisas a agrega.

Prome Minister Sint Maarten, Sra.Silveria Jacobs

Prome Minister Jacobs tambe a expresa su satisfaccion cu e por tabata tey presente pa e reunion tripartite hunto cu tur e delegacionnan pa mas bay profundo ariba topiconan cu e paisnan a toca brevemente anteriormente via medionan virtual. “E la trece miho comprendemento di nos similaridadnan pero tambe di e diferencianan serio cu nos tin y con por ta hasta nos por yuda otro den e areanan ey”, ela indica,

El a splica cu como representante di Sint Maarten el bin e reunion buscando union nan dentro di e tres paisnan y cu esey lo mehora nan eficiencia y tambe yudanan probecha di e economia di nivel. El sigui splica cu unda cu ta posibel Sint Maarten lo ta pusha nan recursonan pa asina nan por ta mas efectivo y eficiente moviendo padilanti.

Minister Jacobs a indica cu e pandemia di COVID-19 ta un desaster cu tabata algo nobo pa e mundo, pero manera cu Sint Maarten ta situa den e faha di horcan, el e señala cu nan ta deal cu disasternan durante e añanan y enrealidad nan no tabata completamente recupera ainda di e desaster di horcan ora cu e pandemia di COVID-19 cuminsa.

Dus mirando cu durante e periodo di tempo ey hopi relacionnan a wordo crea y a prueba di ta fructifero e ta un gran stap pa dilanti pas nos awor aki move hunto pa dilanti y wak con nos por uni y efectua bon cambio pa e pueblo cu nos a wordo elegi pa sirbi”, el a bisa.

El a enfatisa cu e paisnan ta creando relacionnan mas cercano,abase di e reunion aki, cu ya caba eigenlijk tabata tey ora cu nan tabata Antiyas. “Mientras cu nos ta abarca nos diferencianan, nos a descubri cu nos tin mas encomun y hunto nos ta mas fuerte, y mi ta kere cu awe nos a concretisa e relacion ey comprendiendo cu nos por bay leu nos so, pero nos lo bay mas leu ainda hunto y hunto nos ta mas fuerte”, e la agrega.