Den e ultimo dos dianan paisnan Aruba, Corsou, Sint Maarten y Hulanda tabata tin reunionnan constructivo riba e forma cu kier traha hunto den Reino. Den cuadro di esaki locual cu a resalta ta un cooperacion cu ta basa riba igualdad, ‘ownership’ y confiansa mutuo.
Y cu ta cuadra cu e forma cu ta mira nos futuro hunto. Un cooperacion, cu mester conduci na implementacion di e reformanan cu lo crea mas resiliencia y desaroyo sostenibel di e paisnan.
E posicionnan di e 4 paisnan den Reino a ser comparti abiertamente. Aki un biaha mas a enfatisa e importancia di reformanan manera confirma den e Landspakket. E deliberacionnan tabatin como meta pa haci palabracionnan adicional riba e forma cu lo traha den ehecucion di e Landspakket nan.
A logra pa yega na un acuerdo di principio riba e ‘Onderlinge Regeling’, un areglo mutuo. E areglo aki ta bin na lugar di e COHO cu a ser proponi anteriormente. E ley di Reino di COHO a ser entrega na Parlamentonan di e 4 paisnan, y e reaccionnan tabata critico. Aruba Corscou y Sint Maarten a tuma e iniciativa pa bin cu un alternativa cu a ser trata e dos dianan aki. E intencion tabata pa yega na un areglo mutuo, den cual ta describi e forma di traha, forma di raporta, e sosten di Hulanda, y e duracion di e areglo. Y cu ta expresa e relacionnan den Reino a base di igualdad.
Den e dos dianan aki a traha duro pa concretisa e palabracionnan. Teamnan di conseheronan lo finalisa e palabracionnan. Ta spera cu comienso di maart 2023 por firma e acuerdo mutuo.
E 4 paisnan a palabra cu lo cuminsa deliberacionnan na februari 2023, riba e fiansanan di Hulanda den cuadro di e crisis di Corona, cu lo vence 10 di oktober 2023.
Apart di esey a delibera tambe riba un areglo di disputa “Geschillenregeling”. E paisnan lo warda e resultado di deliberacionnan di e Parlamentonan riba e tema aki. Tambe a papia tocante di deficit democratico y un posibel continuacion riba ehecucion di e motie van Raak. Y den e cuadro aki e paisnan a palabra di lo organisa un Conferencia di Reino.
