Conseho di Banco Mundial riba impuesto 9 aña pasa!
Na Aruba ta parce cu nos ta core rond den circulo, cu despues di tanto tempo ta trece nos unda nos a cuminsa. Esaki sigur ta e caso ora nos ta papia di reforma di nos sistema fiscal, cu merece un luga den un di e museonan na San Nicolas. Pa esunnan cu tin hopi tempo ta traha den e materia di impuesto, no ta prome biaha, y probablemente no e ultimo tampoco, cu ta toca e tema aki. Na 2005 Aruba a haya bishita di un ekipo di FIAS (Financial & investment Advisory Service), cu ta un agencia di conseho internacional riba inversion, un esfuerso conhunto di International Finance Corporation, Multilateral Investment Guarantee Agency y Banco Mundial. Na december 2006 e ekipo a entrega su rapport final: Aruba, Diversification for sustainable growth and reduction of risk, cual a ser discuti cu diferente partner na Aruba.
Primeramente e rapport ta concerni diseña un caminda pa Aruba yega na un desaroyo mas diversifica y sostenibel y kico lo ta e terenonan di mayor esfuerso y inversion cu por scoge. Pero tambe ta dedica hopi atencion na Aruba su regimen fiscal y e necesidad di renoba esaki, pa haci esey mas atractivo y por lo tanto mas efectivo den atrae inversion na nos isla.
E ekipo di experto ta yega na e conclusion cu, siendo un isla chikito, cu un poblacion chikito, cu un mercado interno chikito, practicamente sin recurso natural, e posibilidadnan pa diversifica ta hopi limita. Ta constata cu te na e momento ey tur intento a keda sin resultado. Si ta insisti cu mester diversifica, anto mester enfoca riba actividad cu ta trece un balor agrega halto pa por aumenta productividad, cual a keda atras considerablemente den e ultimo añanan. Nos a tende algo nobo aki? No, pero parce cu nos ta scucha.
Den e analisis nan ta distingui dos punto importante: no por simplemente crea un cuadro general pa inversion y wak ken ta yega pa inverti. Tampoco por bay ‘cherry pick’ algun proyecto y dedica fondo publico na nan. Ta trata mas bien di identifica e puntonan fuerte y debil di nos economia y busca actividad economico cu por prospera den e ambiente specifico ey. Como e otro punto importante nan ta señala e necesidad di crea un ambiente propicio pa inversion, unda cu e mayor parti di e trabao ta pa gobierno adapta ley, cambia procesonan administrativo, sistema fiscal, etc. Literalmente e rapport ta bisa:” Den cierto sentido parti di sector priva, incluyendo empresanan, labor, educacion y otro grupo, lo mester coopera, pero ta Gobierno ta esun cu lo mester tuma mayoria di accion ya cu e cosnan cu mester cambia, den nan mayoria ta creacion di maneho publico, o por lo menos suheto na esaki.”
Pa loke ta areanan cu nan ta señala como prioritario ta por ehemplo inverti den y facilita educacion superior, tanto medico y di otro indole, y turismo medico, tambe relaciona cu educacion superior. Nos por constata cu tanto aña despues en berdad nos tin algun universidad medico dunando servicio di educacion na nos region. Pero e pregunta ta pakico nos no a desaroya un maneho mas explicito riba tereno di turismo medico, cual lo a hiba nos tambe na desaroya servicio medico specialisa pa duna servicio na exterior, y de paso mehorando e servicio medico pa Aruba su poblacion.
A dedica bastante atencion na un analisis profundo di e sistema di impuesto, unda a discuti entre otro considera baha tarifa di inkomstenbelasting, winstbelasting, reconsidera necesidad di dividendbelasting y regimen di IPC, y introduci un BTW (VAT). Tambe ta analisa e situacion di impuesto di importacion, cu e conclusion cu lo ta bon pa simplifica e tarifanan yegando na un so. Por cierto esaki ta un di e puntonan cu ministro Bermudez tabata na punto di bay haci prome cu su intento a fracasa pasobra Prome Ministro a realisa cu e no por ‘bende’ e ABB.
Lesando henter e rapport aki, disponibel riba website di Departamento di Asunto Economico (www.arubaeconomicaffairs.aw) ta mira henter e discusion hiba den e ultimo dies aña, resumi na un forma hopi coherente. Loke ta trece nos na e siguiente pregunta: den kico nos a avansa den e ultimo 10 aña? Realmente no a tuma e recomendacionnan aki na cuenta. Nos a introduci un sistema di impuesto cu 90% di pais grandi y chikito no ta uza. A purba kita esey pero no a logra, y awor otro intento tambe a fracasa. Keto bay nos ta enfoca riba e facilidadnan pa esunnan cu ta forma parti di e grupo elite cu tin un areglo IPC y asina por keda practicamente sin paga winstbelasting, pero tur e empresanan chikito y mediano cu por representa e diversificacion no a haya nada. Pa colmo, no a haci practicamente nada na mehora ley, proceso y procedura den gobernacion, cu ta afecta tur empresa. A busca diversificacion den un direccion ekiboca (Europe Meets the Americas) cu no a resulta fructifero. Na practicamente dies aña di publicacion di e rapport memorabel aki, tur tarea t’ey ainda pa cumpli. Ken ta haci esey?
