E website Aruba.com ta e fuente oficial na unda cu tanto bishitante como socionan di turismo por haya tur informacion actualisa y rekisitonan cu tin mester pa bin Aruba.
Despues di diaranson ultimo na unda cu a ser anuncia cu fronteranan lo wordo habri gradualmente, mesora Aruba Tourism Authority a sigui cu su “reopening strategy” activando e siguiente etapa unda Aruba lo habri y unda mester comunica tur rekisitonan na bishitante nan, socio nan den turismo y nos comunidad.
Durante henter e crisis di Covid-19 A.T.A. por medio di su unidad di comunicacion a asegura cu media internacional y tambe socionan local y internacional den turismo tawata na altura di tur e desaroyonan encuanto e medidanan y tambe con Aruba tawata maneha e situacion. Esaki a sosode por medio di diferente canalnan manera entre otro webinars, social media, update cu tawata sali den forma di “newsletter” y comunicadonan di prensa. Constantemente e website oficial di Aruba, www.aruba.com, tawata wordo actualisa cu informacion relevante pa entre otro e turista cu tawata kier a keda na altura di loke ta pasando na Aruba.
Pa e reapertura durante varios simannan e ekipo di A.T.A. a bin ta traha conhuntamente cu tur instancianan concerni pa asina tin tur informacion disponibel. Aki a enfoca riba e “customer journey” di e bishitante for di momento cu e dicidi di bishita nos isla te cu ora e yega y ta moviendo riba nos isla. Internamente, A.T.A. ta califica e etapa aki di e “reopening strategy” como esun di ‘Bonbini’, unda e destino ta preparando pa yama su bishitante nan un caluroso bonbini. Aruba ta “open for happiness” y ta cla pa duna e mesun bon servicio y hospitalidad y sigur brindando e seguridad di higiena na esnan cu lo ta considerando Aruba pa nan vacacion. E mensahenan ariba e plataformanan social di Aruba tambe ta enfoca y ta alinea cu e strategia di comunicacion aki.
Aruba.com a ser completamente adapta y ta enfocando riba diferente aspectonan manera e “Aruba Health & Happiness Code”, un pagina cu ta dedica na 8 “unique selling points” ilustrando pakico bishita Aruba y tambe un pagina dedica como guia cu ta inclui informacion di ora cu e turista book su vacacion te cu despues di su yegada. Y hopi importante ta e pagina cu ta inclui informacion actualisa y detaye referente e rekisitonan di entrada y tambe kico un turista mester haci na momento cu e sinti su mes malo.
Riba aruba.com tin un foro unda ta contesta pregunta di turistanan / duna informacion y tambe ta haci uso di un sistema pa brinda contesta riba pregunta nan. Esaki ta mara na Artificial Intelligence, permitiendo nos ekipa nos mes mas miho ainda cu informacion necesario. Tipo di servicionan aki tabata parti di e plataforma aki caba y ta sigui hunga un papel clave den e etapa di reapertura.
A.T.A. kier a haci un apelacion na un y tur cu ta hayando pregunta di nos bishitantenan tocante habrimento di frontera pa referi un y tur na www.aruba.com cu tin informacion actualisa y oficial.
