Dialuna 14 di juni Aruba Circular Economy Foundation (ACEF) a wordo incorpora oficialmente durante un rueda di prensa na kantoor Notaris Mr MJC Tromp. ACEF ta un fundacion non-profit cu e ambicion pa stimula e transicion di e economia circular na Aruba.
Kico ta economia circular? Economia circular ta representa un cambio di perspectiva, e ta diseña sin crea desperdicio y polucion, ta mantene tur producto y material den uzo y ta regenera tur sistemanan natural.
E meta di ACEF ta pa traha hunto cu departamentonan gubernamental, fundacionnan, institutonan nacional y internacional, comercio y comunidad di Aruba en general riba e meta comun di facilita y aporta na e transicion pa un economia circular sostenibel.
“Nos kier logra e transicion aki door di un serie di obsekionan cu nos a pone pa nos mes,” Egidio Bundel, president di ACEF a bisa. “Na prome luga nos kier stimula e economia local y cera e ciclo material, nos kier curasha e pueblo di Aruba pa evita desperdicio, reduci y reutiliza, ademas di extende e bida util di e material. Tambe nos kier promove tipo di trabounan nobo cu lo surgi como consecuencia di e economia circular. Y tambe nos kier yuda haci e cambio di importado netto pa exportado netto di bienes, servicio y conocemento.”
ACEF ta gradici e grupo grandi di personanan, organisacionnan y institutonan cu ta yuda promove un economia circular na Aruba, y alabes ta invita tur persona cu lo kier yuda e organisacion den e transicion di economia linear pa uno circular pa Aruba, pa join nan. Subi e website www.arubacircular.org pa haya sa mas over di ACEF.
