Segun informacion di Departamento di Salubridad Publico DVG relaciona cu cifranan di vacunacion contra Covid-19 entre nos poblacion, actualmente e cantidad di e poblacion cu a tuma vacuna ta na 62%.
“Aruba ta cerca di logra “Herd Immunity”, inmunidad colectivo (of di grupo)!”, DVG a post riba su pagina di Facebook. Igualmente a destaca e porcentahe di e poblacion cu a vacuna, 62%, comentando cu esaki ‘ta demostra cu nos ta ariba bon caminda’.
Den otro informacion relaciona cu pandemia di Covid-19 na Aruba, DVG a informa cu ayera tabatin 3 persona a recupera di e malesa, mientras a registra un total di cinco caso nobo, di cual tur ta residente. Cu esaki e cantidad di caso activo ayera tabata na 69, mientras e cantidad di fayecido relaciona cu Covid-19 ta 107.
E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 479 test. E tasa di positividad (‘Positivity rate’) entre nos residentenan ta 11%, loke ta indica cu ainda tin persona cu ta malo di Covid-19 pero no ta haci test. Un recordatorio ta bay na cualkier persona cu ta experimentando sintomanan manera tosamento, kentura, dolor di garganta y cualkier sintoma asocia cu ‘griep’, pa por fabor tuma contacto cu DVG pa haci test.
Di su banda, Hospital Dr. Horacio Oduber a informa cu tin un total di 14 persona interna pa ricibi tratamento pa Covid-19, e malesa causa pa e virus SARS-CoV-2. Di e personanan aki, 4 ta den Unidad di Cuido Intensivo (ICU), mientras 10 ta isola riba unidad general di covid.
