Ayera mainta Aruba Center for Leadership Development Foundation a tene un conferencia di prensa pa haci un anuncio importante pa hobennan of personanan cu ta interesa den loke ta trata e tema di liderazgo na unda Sudhakar Dass y Avania Dass di Vedanta Academy India tabata presente pa duna mas informacion di esaki.

Rachelle X. Phillip representante di Aruba Center for Leadership Development Foundation a informa cu luna pasa a crea e fundacion aki cu e mision di fortalece y inspira lidernan actual y den futuro pa nan logra nan meta, no solamente den bida profesional sino tambe den nan bida personal, segun Phillip a bisa.

E manera con nan ta haci esaki ta pa trece conscientisacion riba acceso na hermentnan, experiencia y oportunidad necesario pa desaroyo “nos ta yega na nos mision y logra nos metanan door di identifica e hermentnan mas efectivo pa e desaroyo di e comunidad di liderazgo di Aruba, cu colaboracion y sosten nos ta sigur cu nos lo yega na nos metanan exitosamente,” el a bisa.

Esaki ta encera pa haci investigacionnan, scucha lo cual ta falta cera e lidernan pa loke ta trata conocemento y asina empodera nan pa nan haya nan potencial, nan vision y nan soñonan.

E fundacion ta enfoca riba lidernan di comunidad pa motibo cu nan ta e “driver force” manera Phillip a menciona, no solamente den nan compania, den nan organisacion of den nan fundacion esaki ta dirigi pa full Aruba, pa nan logra nan mision y vision, nan ta bay organisa diferente actividad como seminario, tayernan sesionnan di training y conferencianan, pero pa financia iniciativanan di nan fundacion, nan lo tin mester di donacionnan.

Igualmente, Phillip a señala cu nan como fundacion kier tin un bon comienso pa loke ta trata liderazgo na Aruba, pa e motibo ey diasabra awor 16 di maart na Aruba Marriot Hotel nan ta bay tene nan prome evento e cual ta trata di un recaudacion di fondonan pa Heart-Centered Leadership Foundation.

E evento denomina “Unveiling the Secrets: Lead & Succeed, ta consisti di dos parti, den oranan di mainta lo tin e topico di Inspire & Leadership y otro sesion cu ta cuminsa atardi ta enfoca riba Secrets of Success.

E sesionnan ki ta dirigi pa esnan cu ta traha den posicion di liderazgo of kier traha den e capacidad di lider, cu pa algun biaha ta enfrenta situacionnan cu no ta facil como lider

Pa loke ta trata e trabao cu Sudhakar Dass y Avania Dass ta haci na India pa loke ta trata liderazgo nan kier yuda e fundacion Heart-Centered Leadership Foundation cu ta enfoca riba hobennan, nan tin mas cu 20 aña di experiencia como docentenan di Vedanta Academy na India e cual ta un filosofia di e pais aki cu tin mas cu 5.000 aña y ta basa riba con e personanan ta relaciona cu mundo, cu experiencianan y relacionnan lo bira mas positivo.

Sudhakar y Avania ta biaha rond di mundo dunando lesnan y sesionnan na diferente universidad, banconan of hotel caminda awe lo tin un sesion gratis 4or di atardi na Camara di Comercio cu e topico Business and Relationships.

Sudhakar ta conta cu Vedanta ta un filosofia di bida y pa biba, tin su origen na India pero ta un ciencia di bida universal cu ta aplicable pa cualkier situacion, cualkier ser humano, pa logra e paz y prosperidad a traves di e accion corecto cu e mundo.

Di su parti, Siuoxsie Kock director di Heart-Centered Leadership Foundation a expresa cu nan ta hopi contento door cu e fundacion a ser scogi pa haya e donacion di e evento aki pa motibo cu manera a menciona caba, nan ta un fundacion cu ta traha cu hobennan y nan mision ta pa inspira y empodera hobennan di Aruba, “tur cos cu nos haya ta yuda nos pa nos sigui haci nos trabao.”

Nan ta traha cu hobennan for di edad di 12 aña te cu 25 aña, nan ta duna seminarionan, tayernan na scolnan pa e hobennan por tin e hermentnan cu ora cu nan ta haya nan mes den situacionnan dificil, nan por sa con pa sali for di dje.

“A nos tambe ta kere den liderazgo pasobra pa nos, a bo ta lidera bo bida cu principionan y balornan universal, manera empatia y autenticidad pa duna un bon ehemplo,” el a sigura.

Keyla Rojas, ken ta fungi como manager di programa di e fundacion aki, a señala cu como fundacion semper nan ta depende hopi di fondonan, donacionnan, no solamente monetario pero tambe di hendenan cu ta duna back na comunidad, manera boluntarionan.

E ultimo tres aña nan ta bin trahando hopi riba salud mental y resiliencia mental, nan ta mira cu hobennan mester di un guia, pa motibo cu no tin ni un caminda pa nan expresa nan mes, nan no ta sinti esey na scol ni na cas y cu nan actividadnan segun Rojas ta bisa, nan ta siña nan con e ta OK pa scucha otro y pa cuminsa cera amistadnan.

Nan e momentonan aki nan ta trahando hopi cu scolnan, na unda nan a traha na casi 10 scol secundario unda nan a duna hopi sesion cu scolnan ta pidi pa empodera studiantenan, nan ta haya hermentnan pa maneha ansiedad, “scolnan kier wak nan studiantenan lo bira exitoso y pa hopi biaha tin cosnan cu ta stroba nan, nos t’ey pa yuda nan y duna nan e hermentnan.”