Segun minister Ruiz-Maduro:
Organisacion internacional economico a casi pone Aruba a riba un lista preto pa motibo di dos practica fiscal categorisa manera inhusto y cu ta causa daño. Asina minister Xiomara Ruiz-Maduro a laga sa ayera y a elabora riba kico mester a wordo haci pa evita cu Aruba subi e lista aki, cual segun e mandatario lo por a trece consecuencianan negativo pa nos isla.
“Esaki mi ta bay trece dilanti, si no e ta bay haya un bida riba su mes”, sra. Ruiz-Maduro a expresa. Ta trata akinan riba un maneho fiscal beneficioso den un zona special cu a wordo institui na San Nicolas. Pa esunnan cu kier hiba nan negoshi San Nicolas por haya un incentiva fiscal pa esaki. E ta algo cu tin companianan cu a haci uzo di dje. Pero gobierno ta mira cu den e mundo aki nos no ta nos so, sigur riba e mundo fiscal claramente bo tin e parti di organisacionnan Europeo – entre otro Organisation for Economic Cooperation & Development (OECD) cu ta midi kico bo ta haciendo riba tereno fiscal den bo pais.
E compania aki a midi Aruba tambe anto indica cu tin dos practica fiscal cu nan ta considera dañino y ta duna un competencia inhusto. P’esey mester a haci algo riba esaki sea ta aboli of cambia ley pa asina no tin cu bay riba un lista preto.
Lista preto
E gobierno nobo a huramenta riba 17 di november 2017 y dia 21 di november informacion a drenta cu tin un problema pa locual ta dos partinan fiscal cu tin na Aruba. E departamento di servicionan a pidi gobierno pa reacciona prome cu dia 17 di november. Pues esaki tabata un di e prome puntonan cu gobierno mester a papia riba dje pasobra cu e organisacion a manda bisa si no haya un carta firma pa e minister, Aruba lo a bay riba lista preto. Esaki ta un lista cu ta dificil pa bo baha for di dje despues cu bo ta riba dje segun minister Ruiz-Maduro.
Gobierno mester a pues manda un carta cu a sali mesora den november cual nan a splica cu pa locual ta trata e dos areanan akinan: e parti di e zona special na San Nicolas anto e otro e regimen di transparencia den forma di negoshi cu ta wordo haci. Pa locual ta e forma eynan di negoshi, nan a permiti Aruba pa cambia e ley, cual gobierno di Aruba a indica tambe di cambia e ley eynan y esey nan a acepta. Esun di San Nicolas nan mester a trek in y por tolera esaki pa companianan cu ya tin e status aki, nan por keda haya e beneficio fiscal aki te cu dia 31 december 2020. Cu e carta aki OECD a dicidi pa no pone Aruba riba lista preto. Prome cu 1 februari 2018 esaki mester a wordo conclui.
Parti economico por a bay dilanti na San Nicolas
“Mester a trece esaki dilanti pasobra den e mundo politico manera mi a menciona, e lo a haya su mesun bida. Caminda nan lo cuminsa bisa cu e gobierno nobo a bin y prome cos a haci ta bay contra San Nicolas. Kita net un cos cu ta yuda economia di San Nicolas, no señores.”
E gobierno anterior ta bini cu un begunstigend beleid, bo sa cu mester a hinca esaki den ley y cu e ta algo peligroso pasobra cu e por ta dañino, pues mester wordo hinca bon den otro. “Nan no a haci nada cu esaki. Dia 23 di october 2017, nan a bisa ex minister Bermudez cu di dia 12 di juni nan ta hala su atencion riba e situacion akinan y ningun hende ta worry cu e riesgo, nan a lag’e sinta. Anto pone nos bay den un risico pa nan no tin cu bay den eleccion y bisa hendenan den San Nicolas cu nan no por cumpli cu esaki pasobra nan no a haci cos manera mester ta.”
Esunnan na San Nicolas por a bay dilanti sigur cu algo asina pero e no a wordo drecha debidamente segun e mandatario ta enfatisa. Gobierno ta bisa cu nan lo busca otro manera pa asina eynan toch e economia di San Nicolas bay dilanti. “Nos si lo percura pa haci algo bon y no algo pa mustra hende y despues kita, pasobra no tabata ta na altura di leynan/practicanan cu no ta conforme den Union Europeo.”
Reaccion parlamentario Richard Arends
“Nos ta haya un biaha mas falta di dialogo cu Parlamento e partnernan cu a contribui na e creacion di e regimen fiscal aki, manera entre otro, San Nicolas Business Assosication, ATIA y Camara di Comercio”, parlamentario Richard Arends a expresa segun un relato cu Bon Dia Aruba a ricibi.
“Decisionan asina siguramente ta precupante y ta duna un señal hopi negativo pa inversionistanan local y internacional. Ta demostra cu no kier stimula negoshi na San Nicolas, no kier promove empresanan mediano y chikito, ni tampoco kier sigui den e liña di diversificacion di nos economia,” Sr. Arends a splika. “Ta hopi empresanan ta bezig tag aplica of cu ta den proceso di financiamento, compra di tereno of edificio y remodelacion – con ta bay para cu nan?”, sr. Arends ta puntra. “Con un inversionista por saca su inversion den e dos añanan di transicion cu Gobierno otorga?”
“Hopi empresa cu ta brinda servicionan na e refineria, como tambe ciudadanonan cu ta hasi uso di servicionan di empresanan cu tin e status special aki ta wordo afecta. Nos ta papia aki di banconan, institucionnan financiero, comercio en general y F&B”.
Segun e relato, parlamentario Richard Arends lo bay dirigi un serie di pregunta na minister relaciona cu e desaroyo aki cu sin duda ta creando hopi preocupacion den sector comercial.
