(CuraçaoChronicle) – Nacionnan Uni a desaroya un plan pa inicia un red di servicio di ferry den Caribe. Esaki ta consisti di cuatro ruta, cu un di nan incluyendo Aruba, Bonaire y Corsou.
Otro ruta mester conecta Surnam y Guyana via ferry cu Trinidad & Tobago, cual ta mira como e parti mas importante den e red.
Den proximo periodo ta bay tene consulta cu e paisnan involucra tocante nan disponibilidad pa participa, segun website di noticia maritimo, Schuttevaer.
E propuesta di e proyecto ta prepara pa Comision Economico di ONU pa Latino America y Caribe. Segun Schuttevaer, e plannan no ta nobo, pa decadas tin discusion tocante conexionnan di ferry cu ta spera di ta mas barata y sigur mas limpi cu e aerolineanan usual. Ademas, e servicionan di ferry mester stimula comercio entre e paisnan.
Pero pa motibo di e tamaño di e area y e complehidad asocia, ningun persona a tribi di bin cu un propuesta concreto.
E ruta den cual Surnam ta parti a keda identifica como esun mas viable di e cuatro, ya cu ta mustra e miho margen di ganashi pa e servicio. Segun e estudio, un frecuencia di nos biahe pa siman lo rekeri un boto.
Tin preferencia pa uso di un fast ferry cu por transporta truck cu productonan (agricultural) fresco, entre otro. Esaki lo promove comercio entre paisnan.
Ainda tin hopi trabao pa haci, segun Schuttevaer, prome cu e conexionnan di ferry proponi ta operacional. Paisnan cu kier forma parti di e red di conexion mester provee facilidadnan decente di waf.
Hopi tambe ta depende riba e capacidad di puerto. Mester adresa esaki pa sigura cu e tempo cu e barconan mester pasa na e puerto ta lo mas cortico posibel pa miho eficiencia operacional. Tambe mester revisa reglanan di aduana y inmigracion pa producto y hende.
